Նոր մանրամասներ Կոտայքի մարզում Տեր Կյուրեղի ողբերգական ավտովթարից. պարզվել է՝ վարորդը եղել է մեկ այլ քահանա

Նոր հանգամանքներ են ի հայտ եկել երեկ, մարտի 1-ին, Կոտայքի մարզում տեղի ունեցած ողբերգական ավտովթարի փաստով։  Ինչպես հայտնում է ֆոտոլրագրող Գագիկ Շամշյանը, պարզվել է, որ մոտ 100 մետր ձորը գլորված Ople Zafira-ն վարել է Երևանի բնակիչ 62-ամյա Յակոբիկ Մ․-ն, ով «Սուրբ Կաթողիկե» եկեղեցու քահանա է։ 

Վթարի հետևանքով էլ ուղևորներից՝ Երևանի բանկիչ 74-ամյա Լուրա Օ.-ն մարմնական վնասվածքներով վարորդի հետ տեղափոխվել է «Չարենցավան» բժշկական կենտրոն, իսկ մյուս ուղևոր՝ Երևանի բնակիչ 74-ամյա Գ․ Տալյանը տեղում մահացել է։  Ինչպես ավելի վաղ դեպքի վայրից հայտնել էր ֆոտոլրագրողը, մարտի 1-ին, ճանապարհի մերկասառույցի պատճառով ողբերգական ավտովթար է տեղի ունեցել Կոտայքի մարզում։ 

Ժամը 08։30-ի սահմաններում Ople Zafira մակնիշի ավտոմեքենան Երևան-Սևան ավտոճանապարհի 30 կմ հատվածում դուրս է եկել ճանապարհի երթևեկելեի գոտուց, բախվել երկաթբետոնե արգելապատնեշներին և մոտ 100 մետր մի քանի պտույտ շրջվելով՝ կողաշրջված վիճակում հայտնվել ձորում։ Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով 1 հոգի տեղում մահացել է, 1 հոգի էլ տեղափոխվել է «Չարենցավան» բժշկական կենտրոն։ Դեպքի վայր են ժամանել Արտակարգ իրավիճակների նախարարության փրկարար ծառայոթյան Կոտայքի մարզային փրկարարական վարչության հրշեջ-փրկարարական ջոկատը՝ 1 մարտական հաշվարկով։ 

Փրկարարները մոտ 1 կմ ոտքով դին պատգարակով մոտեցրեցին օպերատիվորեն ժամանած Չարենցավանի բժշկական կենտրոնի  շտապօգնության  ավտոմեքենային։ Դեպքի վայր են ժամանել Ճանապարհային ոստիկանության 2-րդ սպայական գումարտակի 3-րդ վաշտի 2-րդ դասակի ծառայողները՝ գումարտակի հրամանատար Արսեն Մարդոյանի, գումարտակի հրամանատարի տեղակալ Հայկ Դավթյանի, վաշտի հրամանատար Արթուր Պետրոսյանի և դասակի հրամանատար Սարգիս Բագրատյանի գլխավորությամբ։