Վարդենիսում BMW-ն մխրճվել է բենզալցակայանի տարածք՝ կոտրելով պատն ու լիցքավորման սարքը

Այսօր ավտովթար–հրդեհ է տեղի ունեցել Գեղարքունիքի մարզում: Ժամը 18:00-ի սահմաններում Կոտայքի մարզի Գառնի գյուղի բնակիչ, 37-ամյա Տիգրան Ղազարյանը իր վարած BMW մակնիշի ավտոմեքենայով Վարդենիս քաղաքի Երևանյան փողոցում, դեռևս անհայտ հանգամանքներում, դուրս է եկել ճանապարհի երթևեկելի գոտուց, բախվել Լյուդվիգ Մելիքյանին պատկանող բենզալցակայանի լիցքավորման սարքին, կոտրել այն, տեղեկացնում է Shamshyan.com–ը:

Վթարի հետևանքով ավտոմեքենայում հրդեհ է բռնկվել: Օպերատիվորեն դեպքի վայր են ժամանել Արտակարգ իրավիճակների նախարարության փրկարար ծառայության Վարդենիսի թիվ 34 հրշեջ-փրկարարական ջոկատը՝ 1 մարտական հաշվարկով: Հրշեջները ռազմական ոստիկանության և բենզալցակայանի աշխատակիցների հետ նախ կանխել են կրակի տարածումը, ապա մարել այն: Ամբողջությամբ այրվել է բենզալցակայանի լիցքավորման սարքը, բենզալցակայանն էլ կրել է նյութական վնաս, քանի որ բետոնե հենասյուներն ու պատի որոշ հատվածներ նույնպես վնասվել են: