Արայիկ Հարությունյանն իր պլաններն ունի. Ինչ է անում նա «Նիկոլ Փաշինյանի թիկունքում». «Հրապարակ»

 «Արցախում խոսում են, որ նախագահ Արայիկ Հարությունյանի՝ վերջին շրջանի մոսկովյան հաճախակի այցերը մի նպատակ ունեն՝ ամրապնդել սեփական իշխանությունը և տարանջատվել Նիկոլ Փաշինյանից։

Նա, ըստ լավատեղյակների, գիտակցում է, որ Փաշինյանի իշխանության վախճանը մոտ է, և նախապես ուզում է ապահովագրել իրեն, «թռնել» հեղափոխական լիդերի նավից, որում հայտնվել էր 2018-ին՝ կրկին «թռնելով» նախկինների ճամբարից։

Ռուսաստանում, ըստ մեր աղբյուրի, արդեն հասկացել են, որ ուղիղ կարող են աշխատել Արցախի հետ, և Արցախը Ռուսաստանին դե ֆակտո միացնելու ճանապարհային քարտեզն արդեն մշակել են, այդ թվում՝ արցախցիներին ռուսական անձնագրեր տալու, Արցախի հետ տրանսպորտային հաղորդակցության ուղիների, մատակարարման, վերակառուցման և այլ հարցեր ևս։

Սա ձեռնտու է նաև Արցախի նախագահին, ով հույս ունի դառնալ Ռուսաստանի համար ավելի վստահելի պարտնյոր, քան Փաշինյանն է, և իր պաշտոնավարումը երկարաձգել Ռուսաստանի միջոցով։ Ինչ վերաբերում է Արցախի ՊԲ-ն լուծարելու մասին լուրերին, ապա Արցախում գիտեն ընդամենը, որ ՊԲ-ն վերանվանվելու է․ գուցե ինքնապաշտպանական կամ սահմանապահ զորքեր կոչվեն, սակայն գործառույթը նույնն է մնալու»: Այս մասին գրում է «Հրապարակ» թերթը :