ԱՄՆ Ազգային գվարդիայի շուրջ 25 հազար մարտիկներ կտեղակայվեն Վաշինգտոնում՝ Բայդենի երդմնակալության ընթացքում անվտանգության ապահովման համար
ԱՄՆ Ազգային գվարդիայի շուրջ 25 հազար մարտիկներ կտեղակայվեն Վաշինգտոնում՝ ԱՄՆ նորընտիր նախագահ Ջո Բայդենի երդմնակալության ընթացքում կարգուկանոն պահպանելու համար: Այս մասին հայտնում է RT-ն՝ վկայակոչելով Ազգային գվարդիայի մամուլի ծառայության հաղորդագրությունը, որը հրապարկվել է Twitter-ում:
«Պաշտպանության նախարարությունը համաձայնել է տրամադրել մինչև 25 հազար զինծառայող նորընտիր նախագահի երդմնակալության ընթացքում անվտանգության ապահովման համար», - նշվում է հաղորդագրությունում:
Ազգային գվարդիան օգնություն կցուցաբերի ԱՄՆ գաղտնի ծառայությանը, որն էլ պատասխանատու է միջոցառման անվտանգության համար:
Ավելի վաղ հաղորդվել էր, որ ԱՄՆ նախագահ Դոնալդ Թրամփը ծրագրում է լքել Վաշինգտոնը նորընտիր նախագահ Ջո Բայդենի երդմնակալության օրը` հունվարի 20-ի առավոտյան:
Ըստ աղբյուրի ՝ Թրամփը նախատեսում է հրաժեշտի միջոցառում կազմակերպել Մերիլենդ նահանգի Էնդրյուս ավիաբազայում, որտեղ գտնվում են ԱՄՆ նախագահի կողմից օգտագործվող ինքնաթիռները: Աղբյուրը հավելում է, որ Թրամփը նախատեսում է ավելի ուշ մեկնել Ֆլորիդայում գտնվող Մար-ա-Լագոյի իր կեցավայր:
