Ուկրաինայի Obozrevatel TV-ին  ևս մեկ վավերագրական ֆիլմ է նկարահանել այդ երկրում Սաակաշվիլիի քաղաքական գործունեության  մասին  ու  նոր բացահայտումներ արել՝ նրան մեղադրելով մեծ չափի յուրացումների, անգամ պետական գաղտնիք հրապարակելու մեջ:

Ուկրաինայում ցուցադրվել է այդ երկրում Սաակաշվիլիի գրծունեությունը քննող երկրորդ ֆիլմը, որում խոսվում է Ուկրաինայում   երկու կարևոր պաշտոններ զբաղեցնելու ընթացքում նրա կոռուպցիոն  գործունեության  մասին, ինչը հիասթափություն  է առաջացրել  Սաակաշվիլիին   բարեփոխումների խորհրդի պաշտոնը վստահած նախագահ Զելենսկու, քաղաքական գործիչների  ու գործարարների  շրջանում: Վերջիններս համոզված են, որ Ուկրաինայում պաշտոնավարելու ժամանակ նա  իր դիրքն օգտագործել է անձնական բարեկեցության համար:

Քննչական ֆիլմում խոսք է գնում  այդ  երկրում  Վրաստանի նախկին նախագահի թանկարժեք անշարժ գույքի մասին: Հեղինակների  հայտարարությամբ, դեռևս Օդեսայի շրջանի նահանգապետ լինելու տարիներին Սաակաշվիլին  75 հա տարածք էր օտարել Օդեսայի պատմական մասում, որտեղ իր ընկերոջ ՝ գործարարի կողմից կառուցվել էին ժամանակակից բարձրահարկ բնակելի շենքեր: Դրանցից մեկի վերջին հարկում Սաակաշվիլիին հատկացվել էր պենտհաուս՝ ծովի տեսարանով և մեծ վերանդայով: Իսկ երբ փաստը բացահայտվել և հանրային քննարկման առարկա  էր դարձել, Սաակաշվիլին այն օտարել էր`գործը կոծկելու համար: Ուկրաինայում ժամանակավոր բնակություն հաստատած  նրա մայրը կասկածները փարատելու համար երկրի շրջաններից մեկում ցուցադրել էր կիսակառույց առանձնատուն` հայտարարելով, թե սեփական միջոցներով տուն է կառուցում անտուն մնացած որդու համար:

Վավերագրական ֆիլմի հեղինակները պատմել են նաև, որ Ուկրաինայում  Սաակաշվիլիի նկատմամբ տնտեսական յուրացումների մասով  մեղադրանքից բացի կարող  է քրեական գործ հարուցվել նաև պետական գաղտնիք հրապարակելու մեղադրանքով:

Օդեսայի կամավորական հատուկ նշանակության գումարտակի նախկին անդամները Սաակաշվիլիին մեղադրել են ռազմական գաղտնիքի հրապարակման մեջ: Օդեսայի նահանգապետի պաշտոնավարման ժամանակ Ուկրաինայի հակաահաբեկչական գործողությունների գոտի այցելած Սաակաշվիլին վերադառնլուց հետո գիտակցաբար, կամ էլ փառասիրությունից դրդված ռազմական գաղտնիք էր հրապարակել`ցուցադրելով կադրեր, որտեղ  քարտեզի վրա հստակ երևում է  հակաահաբեկչական գոտում ռազմիկների դիրքերի տեղակայման վայրերը:

Այժմ, Ուկրաինայում նրա դիրքերը թուլանալուց հետո, Սաակաշվիլին ուշադրությունը կրկին սևեռել է  դեպի Վրաստան, որտեղ  «Ազգային շարժում» կուսակցությունը հոկտեմբերի 31-ին կայանալիք խրհրդարանական ընտրություններում հաղթելու դեպքում նրան խոստացել է վարչապետի պաշտոնը: