Մենք Ռուսաստան չենք, մենք Բելառուս ենք, և ոչ մի երկիր չպետք է ազդի մեր ժողովրդի որոշման վրա. Տիխանովսկայա
Բելառուսի նախագահի նախկին ընդդիմադիր թեկնածու Սվետլանա Տիխանովսկայան ամերիկյան Fox News հեռուստաալիքի եթերում հայտարարել է, որ անթույլատրելի է «դրսից» Բելառուսի ներքին գործերին միջամտելը։
Ինչպես նշում է հեռուստաալիքը, Բելառուսի նախագահ Ալեքսանդր Լուկաշենկոն այս շաբաթ կրկին խոսել է Ռուսաստանի նախագահ Վլադիմիր Պուտինի հետ՝ մտավախություններ առաջացնելով, որ Մոսկվան կարող է միջամտել Բելառուսի գործերին:
Ընդդիմության առաջնորդը հայտարարել է, որ ակտիվիստները ոչ արևմտամետ են, ոչ էլ հակառուսական տրամադրություններ ունեն․ իրենց երկիրն ինքնիշխան է։
«Մենք Ռուսաստան չենք, մենք Բելառուս ենք։ Մեր ժողովուրդը ցանկանում է ապրել ժողովրդավարական երկրում, և ոչ մի երկիր չպետք է ազդի մեր ժողովրդի որոշման վրա»,- ասել է նա։
Հարցին, թե մեկ տարի առաջ կզարմանար, եթե իրեն տեսներ այն կարգավիճակում, որում այսօր հայտնվել է, նա ժպիտով դրական պատասխան է տվել։
«Իհարկե։ Ես իմ մեջ այնպիսի ուժ գտա, որը չէի կարող պատկերացնել, որ ունեմ»,- պատասխանել է նա։
Հիշեցնենք, որ բողոքի ցույցերն ու ընդդիմադիրների կողմնակիցների հանրահավաքները Մինսկում և Բելառուսի այլ քաղաքներում շարունակվում են օգոստոսի 9-ին երկրում կայացած նախագահական ընտրություններից հետո, որոնց արդյունքներով հաղթել է գործող նախագահ Ալեքսանդր Լուկաշենկոն՝ ստանալով ընտրողների ձայների 80 տոկոսը:
