Թուրքիայում ՔԱԿ-ի անդամի են ձերբակալել, որի ճամպրուկում 37 կգ տրոտիլ է եղել

Թուրքիայի ներքին գործերի նախարարությունը հայտնել է երկրում ահաբեկչական համարվող «Քրդստանի աշխատավորական կուսակցության» (ՔԱԿ) անդամի ձերբակալության մասին․ քուրդ զինյալն իր հետ 37 կգ տրոտիլ պայթուցիկ նյութ է ունեցել, գրում է aa.com.tr կայքը:

Աղբյուրը մանրամասնում է, որ երկրի տարբեր քաղաքներում ահաբեկչություն ծրագրած տղամարդուն ձերբակալելու գործողությունն իրականացվել է ներկայիս Թուրքիայի կազմում գտնվող Ադանայի նահանգում։

Հաղորդվում է, որ պայթուցիկով լի ճամպրուկով քուրդ զինյալը կանգնեցրել է մայրուղով ընթացող մեքենաներից մեկն ու վարորդին խնդրել իրեն մոտակա բնակավայրերից մեկի մոտ իջեցնել։

Ճանապարհին՝ անցակետերից մեկում, մեքենան կանգնեցվել է, զինյալը՝ չեզոքացվել։

Հիշեցնենք, որ ՔԱԿ-ը քրդական կազմակերպություն է, որի հիմնական նպատակն է զինված պայքարի միջոցով Թուրքիայի հարավ-արևելյան, Իրաքի հյուսիսային, Իրանի հյուսիս-արևմտյան և Սիրիայի հյուսիս-արևելյան տարածքներում հիմնել քրդական անկախ պետություն: Թուրք-քրդական հարաբերությունների սրման հերթական փուլը սկսվել է 2015-ի ամռանը:

Կազմակերպությունը 1978 թվականին հիմնադրել է Աբդուլլահ Օջալանը: