ՏԵՍԱՆՅՈՒԹ. Հեռացիր. Լուկաշենկոյի հրաժարականը պահանջող բազմահազարանոց ցույցեր են անցկացվել Մինսկում և Բելառուսի այլ քաղաքներում
Բելառուսի նախագահ Ալեքսանդր Լուկաշենկոյի աջակցիների հանրահավաքին Մինսկում փոխարինել է ընդդիմության բողոքի ակցիան:
Ինչպես հաղորդում է Life.ru-ն, տասնյակ հազարավոր ցուցարարներ են հավաքվել «Մինսկը՝ հերոս քաղաք» հուշակոթողի մոտ: Վերջիններս բացականչում են «Կեցցե՛ Բելառուսը», «Հեռացիր», «Հավատում ենք, կարող ենք, կհաղթենք» արտահայտությունները և ծածանում են սպիտակ-կարմիր-սպիտակ դրոշները:
Բազմահազարանոց բողոքի ակցիաներ են անցկացվում նաև այլ քաղաքներում՝ Գոմելում, Բրեստում և Գրոդնոյում: Ցուցարարների հիմնական պահանջը նույնն է՝ նախագահի հրաժարականը:
Հիշեցնենք, որ Մինսկի Անկախության հրապարակում ավելի վաղ կայացել է Լուկաշենկոյի կողմնակիցների հանրահավաքը, որի ժամանակ ելույթ ունենալով բելառուս առաջնորդը բացառել է երկրում նոր ընտրություններ անցկացնելու գաղափարը՝ ասելով, որ թույլ չի տա նման սցենար, քանի դա կլինի Բելառուսի վախճանը որպես պետություն:
