ԿԳՄՍ-ն ներկայացրել է 7-12-րդ դասարանների համար գրականության ցանկի աշխատանքային լրամշակվող տարբերակը․ Ոսկեդարի և միջնադարյան հայ գրականությունը ներառված են

ԿԳՄՍ նախարարության կողմից «Հայոց լեզու» և «Գրականություն» առարկաների նոր չափորոշիչների և ծրագրի ներկայացումից հետո քննադատությունների ալիք էր սկսվել գերատեսչության դեմ։ Հիմնական դժգոհությունը հանրության շրջանում կապված էր դասական հայ գրականության, Ոսկեդարի և միջնադարյան հայ գրականության նվազեցման հետ, որոնց փոխարեն ավելացվելու էր արտասահմանյան գրականությունը, ինչպես նաև ներառվելու էին ժամանակակից հայկական շատ ստեղծագործություններ։

Կրթության, գիտության, մշակույթի և սպորտի նախարարության Հանրակրթության «Հայոց լեզու» և «Գրականություն» առարկաների չափորոշիչ և ծրագրեր մշակող աշխատանքային խումբը հայտարարությամբ է հանդես եկել՝ տեղեկացնելով, որ Ոսկեդարի և միջնադարյան հայ գրականությունը ուսումնական ծրագրում ներառված է։ 

«Սկսած 5-րդ դասարանից՝ աշակերտները կուսումնասիրեն պատմիչներ Մովսես Խորենացու, Ագաթանգեղոսի, Փավստոս Բուզանդի, Եղիշեի, Ղազար Փարպեցու, ինչպես նաև առակագիրների գործերը: Ծրագրում ներառված են նաև միջնադարյան հեղինակներ Գրիգոր Նարեկացին, Ներսես Շնորհալին, Նահապետ Քուչակը, Սայաթ-Նովան»,- ասվում է հայտարարությունում։

Նշվում է, որ խումբը շարունակում է աշխատել և լրամշակել ծրագիրը՝ քննարկելով հանրության բոլոր առաջարկությունները և դիտարկումները: Իսկ գրականության ամբողջական ցանկը կներկայացվի հանրային քննարկումների արդյունքում լրամշակումներից հետո։

Ցանկին կարող եք ծանոթանալ այս հղումով :