Բագրատյանի՝ խմբակցությունից դուրս գալու պատճառների մասին տեղյակ չեմ. Արման Աբովյան

Ինչպես արդեն հայտնել ենք, ԱԺ պատգամավոր Սերգեյ Բագրատյանն ԱԺ նախագահին ուղղված գրությամբ տեղեկացրել է «Բարգավաճ Հայաստան» խմբակցությունից դուրս գալու մասին։

ԲՀԿ խմբակցության քարտուղար Արման Աբովյանը ArmDaily.am-ի հետ զրույցում նշեց, որ ինքը Բագրատյանի՝ խմբակցությունից դուրս գալու պատճառների մասին տեղյակ չէ և հավելեց, որ Բագրատյանի հետ կապ հաստատել չի կարողացել, քանի որ պատգամավորը Երևանում չէր։

ԲՀԿ պատգամավոր, ԲՀԿ ղեկավար Գագիկ Ծառուկյանի մամուլի խոսնակ Իվետա Տոնոյանն էլ լրատվամիջոցին  փոխանցել է, որ Բագրատյանն անհասանելի է և այդ պատճառով վերջինիս հետ կապ հաստատել չի հաջողվել։

 Հարցին՝ Գագիկ Ծառուկյանը տեղյա՞կ է Սերգեյ Բագրատյանի՝ խմբակցությունից դուրս գալու մասին, Իվետա Տոնոյանը նշեց, որ ինքը փոխանցել է լուրը ԲՀԿ ղեկավարին, սակայն վերջինս չի մեկնաբանել։ Ճշտող հարցին՝ Բագրատյանն այս հարցի շուրջ չի տեղեկացրել նաև Գագիկ  Ծառուկյանի՞ն, Տոնոյանն ասաց. «Ես տեղյակ չեմ, թե պարոն Ծառուկյանը տեղյակ եղել է, թե՝ ոչ»։