ՀԱՊԿ-ի կողմից տրվել է բացատրություն, որ եղել է տեխնիկական վրիպակ. հետամուտ ենք լինելու, որ հետագայում նման վրիպակներ չլինեն. Աննա Նաղդալյան

Հայաստանի էկոնոմիկայի նախարարությունը Ռուսաստանում մեր դեսպանության հետ միասին և սերտ համագործակցության արդյունքում տվեց Մոսկվայի գյուղմթերքի շուկայում հայերի վաճառք իրականացնելու առաջացած խնդրի լուծումը: Այդ հարցին անդրադարձել է նաև փոխվարչապետ Մհեր Գրիգորյանը՝ ԵԱՏՄ խորհրդի նիստի ժամանակ: Նա ներկայացրել է խնդիրը և դա համարել՝ անընդունելի: Մենք հետամուտ ենք լինելու, որ նման զարգացումները կանխվեն։ Այս մասին այսօր «Ազատության»-ի ուղիղ եթերում, պատասխանելով ֆեյսուքյան օգտատերերի հարցերին, նշել է ԱԳՆ մամուլի խոսնակ Աննա Նաղդալյանը՝ անդրադառնալով օգտատիրոջ հարցին, թե ի՞նչ գործողություններ են իրականացվում, որ գյուղատնտեսական մթերքներ արտահանողները Ռուսատանում չենթարկվեն խտրականության:

Անդրադառնալով մեկ այլ օգտատիրոջ հարցին «Russia Today»-ի գլխավոր խմբագիր Մարգարիտա Սիմոնյանի գրառմանը վերաբերյալ, որում օգտատերը նշում էր, թե արդյոք ՌԴ որևէ դիվանագետ ակնարկե՞լ է նման դիրքորոշում ՀՀ ԱԳ նախարարին, Աննա Նաղդալյանը նշել է, որ ԱԳՆ-ն  որևէ աշխատակցի և որևէ մակարդակում հայ- ռուսական հարաբերություններում նման հարցեր չեն բարձրացվել և չեն կարող բարձրացվել և ինքը լիազորված չէ, որևէ լրագրողի նեղ անձնական կարծիքը մեկնաբանելու:

Հարցին, որ ՀԱՊԿ-ն իր թվիթերյան էջում հրապարակել էր Մարգարիտա Սիմոնյանի տեքստը, որը հետո հեռացվել է, Աննա Նաղդալյանը նշեց, որ գրառումը հայտնվելուց հետո, ՀԱՊԿ-ի մեր մշտական ներկայացուցչի միջոցով անմիջապես կապ են հաստատել խնդրի էությունը հասկանալու համար. «Խնդիրը լուծվել է, իրենց կողմից տրվել է բացատրություն, որ սա եղել է տեխնիկական վրիպակ: Մենք ելնում ենք ՀԱՊԿ-ի այդ բացատրությունից և հետամուտ ենք լինելու, որ հետագայում նման վրիպակներ չլինեն»։