Հսկայական գումարներ ծախսեցին, կերան, դրա համար էլ ջրահեռացումները լավ չեն աշխատում. Վարդան Ղուկասյանը խոսել է Գյումրու ջրհեղեղի մասին

Գյումրիում հուլիսի 13-ին մի քանի ժամ տեղացած հորդառատ անձրևը և կարկուտն արտակարգ դրություն են ստեղծել, մի շարք թաղամասեր ու փողոցներ ողողվել են ջրով։ Փրկարարները գործածել են ռետինե նավակներ, գործի է դրվել 13 հրշեջ մեքենա Ջրով ու կարկուտով են լցվել նաև տներն ու նկուղները։

Գյումրու նախկին քաղաքապետ, ԱԺ ԲՀԿ-ական պատգամավոր Վարդան Ղուկասյանն ArmDaily.am-ի հետ զրույցում նշել է, որ 60 տարեկան է, և նման բան տեսած չկար։

«Հսկայական գումարներ ծախսեցին, կերան, դրա համար էլ ջրահեռացումները լավ չեն աշխատում, ոչ միայն այդ հատվածում, ընդհանրապես»,-նշել է նա։ Դիտարկմանը՝ կբարձրացնի այդ հարցը խորհրդարանում, պատգամավորը նշեց, որ դրա մասին ամբողջ հանրապետությունով են խոսում. 

«Ամբողջ հեռուստաալիքներն ադ մասին են խոսում, ես ի՞նչ պիտի ասեմ, բոլորն էլ լավ տեսել են։ Էհ, որ բարձրացնեմ ինչ, ինչի՞ չեն տեսնում։ Կապրենք, կտեսնենք»։

Թե մոտավորապես քանի ընտանիք է տուժել,Ղուկասյանը դժվարանում է ասել. «Բայց ավտոկայանի թաղամասում շատ են տուժածները, հենց ջրհեղեղ բան է լինում, լցվում է մարդկանց տները։ Վնասվել են նաև շատ ավտոմեքենաներ։ Զանգեք քաղաքապետարան, դա նրանց պարտականությունն է, որ ձեր հարցերին պատասխանեն»։