Առնվազն 2 տարի դուք լսել եք իմ հեռախոսները. Նաիրա Զոհրաբյան
Ձեր բերած բոլոր ապացույցները չունեին արժանահավատություն: ԱԺ ամբիոնից «Բարգավաճ Հայաստան» խմբակցության անդամ Նաիրա Զոհրաբյանն այս խոսքերով դիմեց ՀՀ գլխավոր դատախազ Արթուր Դավթյանին:
«Ո՞վ կարող է երաշխավորել, որ լրիվ ուրիշ գործով իբր հայտնաբերված թղթերը դուք չեք պատրաստել կամ դուք չեք խմբագրել: Ո՞վ՝ ընթերականը, բերեք նրանց Ազգային ժողով, մենք նրանց հարցեր ունենք տալու: Դուք վատ դատախազ եք, վատ իրավաբան եք, որովհետեւ բարոյականություն չունեցող մարդ եք: Քիչ առաջ ավարտվեց խուզարկությունը ԲՀԿ-ի կենտրոնական գրասենյակի իմ աշխատակազմում: Ինչ-որ լոլո էիք գրել:
Գրել են՝ «Նաիրա Զոհրաբյանի աշխատասենյակում կարող էին պահվել ընտրությունների ժամանակ ընտրողներին կաշառք տալու հանգամանքը հավաստող այլ փաստեր, ընտրացուցակներ, ընտրողներ»,- ասաց Զոհրաբյանը:
Զոհրաբյանը նաև նշեց, որ իրեն շատ բաներում կարող են մեղադրել, օրինակ՝ էմոցիոնալ լինելու մեջ, բայց կաշառք տալու մասին խոսք լինել չի կարող:
«Նաիրա Զոհրաբյանը հենց էստեղից ձեռքը կկտրի, եթե մեկը կապացուցի, որ Նաիրա Զոհրաբյանը կարող է ինչ-որ մեկին կաշառք տալ»,- ասաց Զոհրաբյանը:
Ես հայտարարություն եմ տալու հանցագործության մասին, որ այս նյութում ասում եք, որ հեռախոսազրույցներից մեկում Նաիրա Զոհարբյանն ասել է՝ «դե փաստորեն էս ժողովուրդն առանց ընտրակաշառքի ԲՀԿ-ին ձայն չի տալիս»: Սա ապացուցում է, որ առնվազն 2 տարի դուք լսել եք իմ հեռախոսները:
