Վեհափառի և 6 սրբազանների քրեական գործով նոր դատավոր կա

Ամենայն Հայոց Կաթողիկոսի և 6 սրբազանների «քրեական գործը» մակագրվել է Արմավիրի մարզի առաջին ատյանի ընդհանուր իրավասության քրեական դատարանի դատավոր Սերժ Ռուշանյանին։ Այս մասին տեղեկանում ենք «Դատալեքս» դատական տեղեկատվական համակարգից։

Հիշեցնենք, որ ավելի վաղ այս գործը մակագրվել էր դատավոր Հակոբ Մանուկյանին, սակայն նա առաջին իսկ նիստի ընթացքում ինքնաբացարկ էր հայտնել և հրաժարվել գործի քննությունից։

Գործի նախապատմությունը․

Վեհափառ Հայրապետին և Հայ Առաքելական Սուրբ Եկեղեցու 6 Սրբազաններին (Նաթան, Հայկազուն, Վահան, Մակար, Մուշեղ և Հովնան սրբազաններին) մեղադրանք է առաջադրվել ՀՀ Քրեական օրենսգրքի 507-րդ հոդվածի 2-րդ մասով։ Նրանց նկատմամբ որպես խափանման միջոց է ընտրվել բացակայելու արգելքը։

Քրեական գործը վերաբերում է Արման Սարոյանի (նախկին Տ․ Գևորգ եպիսկոպոս Սարոյան) քաղաքացիական հայցին, որով նա պահանջում էր իրեն վերականգնել Մասյացոտնի թեմակալ առաջնորդի պաշտոնում։

 Ըստ մեղադրանքի՝ Կաթողիկոսը և Գերագույն հոգևոր խորհրդի 6 սրբազանները չեն կատարել քաղաքացիական դատարանի միջանկյալ որոշումը՝ ապահովելու Արման Սարոյանի պաշտոնավարումը որպես թեմակալ առաջնորդ։