ԱՄՆ-ն պատժամիջոցներից մոլուցքային կախվածություն ունի․ Իրանի ԱԳՆ

Իրանի արտաքին գործերի նախարարության մամուլի քարտուղար Էսմայիլ Բաղային Միացյալ Նահանգներին մեղադրել է պատժամիջոցներից «կախվածություն» ունենալու մեջ։

Նա նշել է, որ ԱՄՆ ֆինանսների նախարարը հպարտանում է տնտեսական սահմանափակումներով Իրանին «խեղդելու» հաջողությամբ։ Ըստ Բաղայիի՝ նման հայտարարությունները, բացի ցուցադրական լինելուց, վկայում են պատժամիջոցներից Վաշինգտոնի մոլուցքային կախվածության մասին։ Իրանցի դիվանագետի պնդմամբ՝ դիվանագիտություն իրականացնելու անկարողության դեպքում ԱՄՆ-ն դիմում է պատժամիջոցների, իսկ դրանց ձախողման պարագայում պարզապես ավելացնում է դրանց չափաբաժինը։ Նա ընդգծել է, որ սա ոչ թե քաղաքականություն է, այլ մտածելու կարողությանը փոխարինած սովորություն ու վտանգավոր կախվածություն։

Բաղային հավելել է, որ Իրանը տասնամյակների ընթացքում ապացուցել է, որ նման ծեծված կարգախոսներով հնարավոր չէ իրեն խեղդել։ Նրա խոսքով՝ իրական վտանգն այն է, որ ամերիկացի քաղաքական գործիչները, կառչած մնալով այդ վատ սովորությունից, ի վերջո կզրկվեն իրենց իսկ հրահրած ճգնաժամից նվազ նվաստացուցիչ ելք գտնելու վերջին հնարավորությունից։