Եվրոպան թանկ է վճարում շոգի համար․ տնտեսությանը՝ €180 մլրդ հարված

Այս տարվա անոմալ շոգ ամառը Եվրամիության տնտեսության համար կարժենա շուրջ 180 միլիարդ եվրո, ինչը կազմում է ՀՆԱ-ի մոտ 1%-ը։

Նոր վերլուծության համաձայն՝ նշված գումարը հավասարազոր է այն ամբողջ տնտեսական աճին, որը դաշինքը նախատեսել էր ապահովել 2026 թվականին։ Triodos Bank-ի ուսումնասիրության տվյալներով՝ Ֆրանսիան կարող է կորցնել աճի 1,4 տոկոսային կետ, ինչի հետևանքով նրա տնտեսությունը կարող է կրճատվել 0,6%-ով։ Նիդեռլանդներում 0,8 կետի անկումը գրեթե ամբողջությամբ չեղարկելու է տնտեսության սպասվող ընդլայնումը։ 

Փորձագետները նշում են, որ ծայրահեղ շոգի պայմաններում աշխատելու դժվարությունները դառնալու են տնտեսության գլխավոր արգելակող գործոնը։ Նրանց գնահատմամբ՝ աշխատանքի արտադրողականության կորուստը կարող է Եվրամիության ՀՆԱ-ից խլել մոտ 0,6%։ Տարածաշրջանի գյուղատնտեսական արտադրությունը հնարավոր է կրճատվի 3–7%-ով։ Այսպես, տեղումների պակասի պատճառով Ավստրիայի ագրոսեկտորին երաշտը արդեն հասցրել է մոտ 1 միլիարդ եվրոյի վնաս։ 

Դանուբ և Ռեյն գետերում ջրի ցածր մակարդակի պատճառով սահմանափակվել է հունգարական «Պակշ» ԱԷԿ-ի աշխատանքը, Ռումինիան ստիպված է եղել պայթեցնել ժայռեր՝ ջուրը դեպի ռեակտոր ուղղելու համար, ինչպես նաև սահմանափակվել է գետային նավերի բեռնվածությունը։ Հունիսի կեսերից մինչև հուլիսի սկիզբ ձգված ռեկորդային շոգի ալիքի ընթացքում ամենաշատ տուժած եվրոպական վեց երկրներում գրանցվել է առնվազն 14 հազար հավելուրդային մահ։ Ամառը դեռ չի ավարտվել, և այս շաբաթ Ֆրանսիան ու Մեծ Բրիտանիան պատրաստվում են սեզոնի հինգերորդ շոգի ալիքին. Ֆրանսիայի հարավ-արևելքում ջերմաստիճանը մոտենում է 40°C-ի, իսկ Մեծ Բրիտանիայում կանխատեսվում է մինչև 36°C։ Triodos Bank-ի վերլուծաբանները կոչ են անում ընթացիկ ամառը չդիտարկել որպես մեկանգամյա անոմալ դեպք՝ նախազգուշացնելով, որ ծայրահեղ շոգը կարող է դառնալ «կառուցվածքային երևույթ»։ Փորձագետների կարծիքով՝ պետությունները կարող են մեղմել վնասը ոռոգման, շենքերի մեկուսացման, հովացման համակարգերի և աշխատանքային ժամանակացույցի ճշգրտման մեջ ներդրումներ անելու միջոցով։