Նորածին աղջկան գտել են երկաթե թիթեղների տակ․ բժիշկներին հաջողվել է փրկել նրա կյանքը

 Օգոստոսի 10-ին՝ ժամը 20:40-ի սահմաններում, ՀՀ ՆԳՆ ոստիկանության համայնքային ոստիկանության գլխավոր վարչության Մաշտոցի բաժնում օպերատիվ տեղեկություններ են ստացվել Հալաբյան 13 շենքի խաղահրապարակում՝ երկաթե թիթեղների տակ գտնվող նորածնի մասին։ 

Մինչ համայնքային ոստիկանների տեղ հասնելը, Երևանի 103 շտապօգնության բժիշկների թիվ 25 խումբը տեղում անհրաժեշտ բուժօգնություն է ցուցաբերել նորածին աղջկան, կապել պորտալարն ու նրան տեղափոխել «Վերարտադրողական առողջության պերինատոլոգիայի, մանկաբարձության և գինեկոլոգիայի հանրապետական ինստիտուտ» (Ռազմիկ Աբրահամյանի ծննդատուն)։ 

Բժիշկների մասնագիտական աշխատանքի շնորհիվ փրկվել է փոքրիկի կյանքը, սակայն նա դեռ պետք է որոշ ժամանակ մնա մասնագետների հսկողության տակ։ 

Դեպքի առթիվ քննչական բաժնում քրեական վարույթ է նախաձեռնվել։ Համայնքային ոստիկաններն ու քննիչները ձեռնարկում են միջոցներ երեխայի մոր ինքնությունը պարզելու ուղղությամբ։