Որոշ քաղաքական ուժերի մոտ այդպես էլ չի ստացվում ճիշտ քաղաքական հաշվարկ անել. Մակունցը՝ Ծառուկյանի հայտարարության մասին

«Որոշ քաղաքական ուժերի մոտ այդպես էլ չի ստացվում ճիշտ քաղաքական հաշվարկ անել: Վարչապետի՝ կորոնավիրուսով վարակված լինելու հանգամանքի վրա բոլոր խաղադրույքները դնելը և կառավարող ուժի դեմ համավարակի պայմաններում կոնսոլիդացիայի կոչ անելը՝ քաղաքական ու անձնական մղումներին հագուրդ տալու նպատակով, նույնն է, ինչ պատերազմական վիճակում դավադիր գործողություններ ձեռնարկելը պետության դեմ»:

Այս մասին, ի պատասխան ԲՀԿ առաջնորդ Գագիկ Ծառուկյանի հայտարարությունների, ֆեյսբուքյան իր էջում գրել է «Իմ քայլը» խմբակցության ղեկավար Լիլիթ Մակունցը:

«Բայց իհարկե որոշ մարդիկ դա փորձում են հրամցնել «երկրի մասին մտածողների, հանուն ժողովրդի ու պետության» բարձրագոչ ելույթներով:

Այո՛, չունենք թալանի ու կոռուպցիայի մեջ թաթախված լինելու փորձ:

Այո՛, չունենք ապարանքներ և մեր պաշտոնը չենք օգտագործել բիզնեսներ հիմնելու ու խլելու համար:

Այո՛, չենք կեղեքում ու չենք թալանում:

Եվ այո՛, հաղթահարելու ենք այս վիճակը:

Ափսոսում եմ, որ Բարգավաճ Հայաստան խմբակցության ղեկավարն իրեն դիտարկում է ոչ թե Հայաստանի իշխանությունների և քաղաքացիների հետ այս ծանր իրավիճակը հաղթահարողի դիրքերից, այլ որպես մերժված, բայց վերականգնվել ցանկացող քաղաքական խմբերի մի մասնիկ»,-եզրափակել է նա:

Հիշեցնենք, որ ԲՀԿ առաջնոդ Գագիկն Ծառուկյանը երեկ հայտարարել էր, թե կառավարության 100 տոկոսը պետք է փոխվի, որովհետև բոլոր ոլորտները ձախողված են: