ԵՄ պահպանողականների առաջնորդը կոչ է արել Աֆրիկայում միգրանտների վերադարձի կենտրոններ ստեղծել

Եվրոպական ժողովրդական կուսակցության (ԵԺԿ) առաջնորդ Մանֆրեդ Վեբերը կոչ է արել հնարավորինս արագ Աֆրիկայում ստեղծել միգրանտների վերադարձի կենտրոններ։ Նրա հայտարարությունը հաջորդել է հուլիսի վերջին Իսպանիայի ինքնավար Սեուտա քաղաքում տեղի ունեցած իրադարձություններին, երբ տասնյակ հազարավոր անօրինական միգրանտներ փորձել են մուտք գործել իսպանական տարածք։ Այս մասին հայտնում է Politico-ն։

Վեբերի խոսքով՝ Սեուտայի դեպքերը ցույց են տվել, որ հարևան երկրների հետ սերտ համագործակցությունը կարող է արդյունավետ լինել։

«Մարոկկոն անմիջապես հետ ընդունեց մարդկանց։ Ոչ ոքի չհաջողվեց ավելի առաջ շարժվել դեպի Շենգենյան գոտի։ Եվրոպան պետք է արագ Աֆրիկայում վերադարձի կենտրոններ ստեղծի»,- հայտարարել է նա։

ԵԺԿ առաջնորդը պաշտպանել է նաև միգրացիայի հարցերով ԵՄ հանձնակատար Մագնուս Բրունների առաջարկները։ Դրանց համաձայն՝ Եվրամիության անդամ չհանդիսացող երկրներին կարող են առաջարկվել ավելի սերտ առևտրային կապեր, տնտեսական համագործակցություն և օրինական միգրացիայի հնարավորություններ՝ իրենց տարածքում վերադարձի կենտրոններ ստեղծելու համաձայնության դիմաց։

Վեբերի համոզմամբ՝ Եվրոպայում մնալու իրավունք չունեցող միգրանտները պետք է լքեն մայրցամաքը, իսկ նրանց վերադարձը չպետք է կախված լինի ԵՄ առանձին անդամ երկրների քաղաքական կամքից։

Նա նաև դեմ է արտահայտվել ԵՄ ներքին սահմաններին վերահսկողությունը որպես երկարաժամկետ լուծում դիտարկելուն։ Ըստ Վեբերի՝ այն կարող է անհրաժեշտ լինել բացառիկ իրավիճակներում, սակայն չի վերացնում խնդրի հիմնական պատճառները։

«Հետևաբար կարող է լինել միայն մեկ պատասխան՝ Եվրոպայի արտաքին սահմանի ուժեղ և միասնական պաշտպանություն»,- նշել է նա։

Վեբերը Սեուտայում ստեղծված ճգնաժամը, որի հետևանքով, ըստ հրապարակման, մոտ 100 մարդ է զոհվել, կապել է նաև առանձին երկրների միակողմանի որոշումների հետ։ Նրա պնդմամբ՝ Իսպանիայի կառավարության «քաղաքական ազդակներն» անմիջական ազդեցություն են ունեցել միգրացիոն երթուղիների վրա։

Ավելի վաղ Ավստրիայի Եվրոպայի, ինտեգրման և ընտանիքի հարցերով նախարար Կլաուդիա Բաուերը Իսպանիային կոչ էր արել էականորեն ուժեղացնել սահմանների պաշտպանությունը՝ սոցիալական ցանցերում օգոստոսի 15-ին Սեուտա զանգվածային ներխուժման նոր կոչերի ֆոնին։