Ոստիկանությունը ստուգել է քրեական ենթամշակույթի հնարավոր հավաքատեղիները Երևանում

Մայրաքաղաքի մի շարք հատվածներում ՆԳՆ ծառայողներն ու պարեկները համատեղ ուժեղացված ծառայություն են իրականացրել՝ հանցավորության կանխարգելման և բացահայտման նպատակով։

Հանցագործությունների կանխմանն ու բացահայտմանն ուղղված միջոցառումների շրջանակում ՆԳՆ Քրեական ոստիկանության Երևան քաղաքի վարչության, Համայնքային ոստիկանության գլխավոր վարչության ծառայողները և Երևանի պարեկները մայրաքաղաքի տարբեր հատվածներում իրականացրել են ուժեղացված ծառայություն։

Գործողությունների ընթացքում ստուգումներ են կատարվել քրեական ենթամշակույթի հակում ունեցող անձանց հավաքատեղիներում, ինչպես նաև օպերատիվ տվյալներով ստացված տարբեր հասցեներում։

Իրականացված միջոցառումների արդյունքում հայտնաբերվել են երթևեկության կանոնները խախտողներ, զենք-զինամթերք և տարբեր տեսակի թմրամիջոցներ։

ՆԳՆ ոստիկանության կողմից նմանօրինակ ուժեղացված ծառայությունները կրում են շարունակական բնույթ։