Մեքքայի համաձայնագիրը սպառնում է տարածաշրջանային կայունությանը․ The Jerusalem Post

Պակիստանը հայտարարել է, որ Մեքքայում Թուրքիայի և Սաուդյան Արաբիայի հետ ստորագրված համատեղ պաշտպանական համաձայնագիրը ուղղված չէ որևէ երկրի դեմ, և դրան կարող են միանալ նաև այլ պետություններ։

Այս մասին X-ում գրել է Պակիստանի փոխվարչապետ և արտգործնախարար Իսհակ Դարը։

Նրա խոսքով՝ Մեքքայի համաձայնագիրը «զուտ պաշտպանական» բնույթ ունի և նպատակ ունի ամրապնդել տարածաշրջանում խաղաղության, կայունության և բարեկեցության ապահովմանն ուղղված ջանքերը։

Դարը նշել է, որ համաձայնագիրը մի քանի տարվա քննարկումների և փոխադարձ խորհրդակցությունների արդյունք է։ Այն, ըստ նրա, նպատակ ունի խորացնել երեք երկրների ռազմավարական համագործակցությունը՝ տարբեր անվտանգային մարտահրավերներին դիմակայելու համար։

Համաձայնագրով սահմանվում է նաև, որ երեք երկրներից մեկի դեմ արտաքին զինված հարձակումը կհամարվի հարձակում բոլոր երեքի դեմ։ Պակիստանի արտգործնախարարը նշել է, որ այս սկզբունքը համապատասխանում է ՄԱԿ-ի կանոնադրության 51-րդ հոդվածով նախատեսված անհատական և հավաքական ինքնապաշտպանության իրավունքին։

Միաժամանակ Դարը շեշտել է, որ նոր համաձայնագիրը չի փոխարինում երեք երկրների միջև արդեն գործող երկկողմ կամ բազմակողմ պայմանավորվածություններին և չի ազդում այլ պետությունների կամ կազմակերպությունների հետ նրանց ունեցած համաձայնագրերի վրա։

Պակիստանը, Սաուդյան Արաբիան և Թուրքիան համաձայնագիրը ստորագրել են օգոստոսի 7-ին Մեքքայում՝ Պակիստանի վարչապետ Շեհբազ Շարիֆի, Սաուդյան Արաբիայի թագաժառանգ Մուհամեդ բին Սալմանի և Թուրքիայի նախագահ Ռեջեփ Թայիփ Էրդողանի ներկայությամբ։

Իսլամական համագործակցության կազմակերպությունը ևս ողջունել է համաձայնագիրը՝ այն անվանելով «կարևոր ռազմավարական քայլ»։ Կազմակերպության գլխավոր քարտուղար Հիսեյն Բրահիմ Տահան հայտարարել է, որ այն կարող է նպաստել տարածաշրջանում և իսլամական աշխարհում անվտանգության ու կայունության ամրապնդմանը։