The Guardian-ի հոդվածը՝ ԱՄՆ դրամաշնորհից օգտվող «ապատեղեկատվություն տարածող հայկական կայքի վերաբերյալ»

Բրիտանական The Guardian պարբերականը հոդված է հրապարակել հայկական կայքերից մեկի մասին հետևյալ վերնագրով՝ «ԱՄՆ-ի կողմից ֆինանսավորվող կայքը ապատեղեկատվություն է տարածում COVID-19-ի վերաբերյալ», հայտնում է shantnews.am-ը: 

Ըստ պարբերականի՝ Medmedia.am հայկական կայքը իր գործունեությունը սկսել է ԱՄՆ պետքարտուղարության դրամաշնորհի օգնությամբ, և դրա նպատակն է եղել խթանել ժողովրդավարությունը, սակայն փոխարենը կայքը կեղծ տեղեկություններ է տարածել կորոնավիրուսի մասին: Այսպիսի եզրակացության է եկել բրիտանական openDemocracy լրատվական կայքը հետաքննություն կատարելուց հետո:

The Guardian-ը նշում է, որ Medmedia-ի ամենահայտնի հոդվածները COVID-19-ն անվանում են «կեղծ համավարակ» և ապատեղեկատվություն են տարածում, թե դիահերձարաններից մեկը մահացած հիվանդի ընտանիքին մի քանի հարյուր դոլար է առաջարկել, եթե ընտանիքը համաձայնի ասել, որ մահը վրա է հասել կորոնավիրուսի պատճառով:

ԱՄՆ պետքարտուղարությունը դրամաշնորհը տվել է Երիտասարդ բժիշկների հայկական ասոցիացիա կոչվող խմբին, որը կայքը ստեղծել է անցյալ տարի և որը ղեկավարվում է բժիշկ Գևորգ Գրիգորյանի կողմից:

Պարբերականը նաև նշում է, որ Գրիգորյանը մեծապես քննադատել է առողջապահության նախարարությանը և գերատեչության պատվաստումների ծրագիրը, ինչպես նաև դեմ է ԼԳԲՏ համայնքի ներկայացուցիչներին:

The Guardian-ը կապվել է Գևորգ Գրիգորյանի հետ, ով ասել է, որ կապ չունի որևէ քաղաքական կուսակցության հետ, իսկ իր կայքի նպատակն է եղել հանրության ձայնը լսելի դարձնել, լսելի դարձնել մասագետների, բժիշկների կարծիքները:

Գրիգորյանը նաև ասել է, որ իր հետ կապ են հաստատել է նաև ԱՄՆ դեսպանությունից՝ մտահոգություն հայտնելով կայքում տեղ գտած հոդվածների մասին:

Պարբերականը նշում է, որ openDemocracy-ի կատարած հետաքննության արդյունքում պարզ է դարձել, որ Medmedia-ն հրապարակել է որոշ լրատվական հոդվածներ, սակայն կայքում տեղ գտած վերլուծական հոդվածները հիմնականում «ապատեղեկատվություն տարածող ֆեյսբուքյան գրառումների վերահրապարակում են եղել»: