Ուզբեկստանում բացվում են շինանյութերի, ավտոսպասարկման ու նոտարական գրասենյակների ծառայությունները

Ուզբեկստանի իշխանություններն ապրիլի 24-ից թույլատրել են շինանյութերի շուկաների, խոշոր ավտոծառայությունների ու նոտարական գրասենյակների գործունեությունը կարանտինային միջոցառումների ժամանակ: Ինչպես հայտնում է РИА Новости-ն, այս մասին հաղորդել են երկրի նախարարների կաբինետի օպերատիվ շտաբում:

Ուզբեկստանում մարտի 15-ից՝ Ֆրանսիայից քաղաքացիների վերադարձից հետո ի հայտ են եկել  COVID-19-ի առաջին դեպքերը:  Ուրբաթ օրը կորոնավիրուսով վարակվածների դեպքերի թիվը հասել է 1804-ի, 8 պացիենտ մահացել է, 621-ը՝ ապաքինվել: Երկրի իշխանությունները ապրիլի 1-ից Տաշքենդում և շրջաններում  ինքնամեկուսացման ռեժիմ են սահմանել, 65-ից բարձր տարիքի անձանց արգելված է դուրս գալ տներից: Գրեթե 90 հզր մարդ գտնվում է կարանտինում: Կորոնավիրուսի դեմ պայքարի հատուկ հանձնաժողովը  սահմանափակումները երկարաձգել է մինչև մայիսի 10-ը:

«Ապրիլի 25-ից մի շարք ոլորտների տնտեսվարող սուբյեկտները կսկսեն գործունեությունը կարանտինային միջոցառումների ընթացքում: Համաճարակի ընթացքում նշված սուբյեկտները պետք է խստորեն պահպանեն սանիտարա-հակահամաճարակային կանոնները»,- ասել է հատուկ շտաբի ներկայացուցիչը: