Առողջապահական և աշխատանքի տեսչական մարմնի 2 աշխատակցի մոտ հայտնաբերվել է կորոնավիրուս
Այս պահին Առողջապահական և աշխատանքի տեսչական մարմնի Երևանի տարածքային կենտրոնի աշխատակիցներից 2-ի մոտ հաստատված է կորոնավիրուս, նրանց վիճակը շատ լավ է, 17-ը մեկուսացված է, 14-ը՝ ինքնամեկուսացված: Այս մասին այսօր` ապրիլի 3-ն, պարետատանը կայացած հերթական ասուլիսի ժամանակ ասաց ԱԱՏՄղեկավար Հակոբ Ավագյանը:
«Ցավոք, մեր հերթապահներից ևս վարակվեցին: Այս պահի դրությամբ նրանց մոտ ծանր վիճակ չի գրանցվել: Ամսի 1-ից հետո, երբ մեր աշխատակիցները միացան «Զվարթնոցի» հերթապահներին՝ օգնելու մեծ թռիչքների ժամանակ, հիշում եք՝ ուժեղացրել էինք հերթապահությունը, այդ ժամանակ մեր Երևանի տարածքային կենտրոնի բժիշկ-համաճակաբաններից մեկի մոտ հայտնաբերվեց վարակը:
Երեկ նա «Նորք» ինֆեկցիոն հիվանդանոցից տեղափոխվել է մեկուսացման, մյուսի մոտ, որը նրա հետ հերթապահել էր, ևս հաստատվեց վարակը: Նրա մոտ սկզբում կասկածում էին թոքաբորբ, երեկ, բարեբախտաբար, հերքվեց, նրա վիճակը այժմ ևս լավ է»,- ասաց Ավագյանը:
