Կոմունալ վճարումները կսառեցվեն, թե՞ ոչ

Auroranews- ը այս օրերին բազմաթիվ զանգեր է ստանում քաղաքացիներից, որոնք մասնավորապես հետաքրքրվում են, թե երկրում կորոնավիրուսով պայմանավորված իրավիճակի պայմաններում՝ կոմունալ, հեռախոսային, ինտերնետային ծառայությունների վճարումները սառեցվելու են, թե՝ ոչ:

Մեզ զանգահարած քաղաքացիներից շատերը նշեցին, որ աշխատում են ոչ պետական, մասնավոր կազմակերպություններում: Կազմակերպություններն այս օրերին դադարեցրել են գործունեությունը և աշխատողները գնացել են չվարձատրվող արձակուրդի: 

«Այս պայմաններում ամեն տեսակի վճարում կատարելը անհնարին է դառնում»,- նշում են քաղաքացիները:

Պարզելու նպատակով, թե այս հարցով քննարկումներ, կայացված որոշում կա՞ Auroranews- ը կապ հաստատեց Հանրային ծառայությունները կարգավորող հանձնաժողովի լրատվության բաժնի պատասխանատուի հետ: Այնտեղից մեզ ասացին, որ այս պահին նշված հարցով քննարկում չկա, եթե առաջիկայում լինի՝ կտեղեկացնեն:

Հայաստանի էլեկտրական ցանցերի մամուլի խոսնակն էլ մեզ հետ զրույցում նշեց, որ հարցն իրենց ուշարդության կենտրոնում է և իրենց աշխատակիցները ակտիվորեն հետևում են այս հարցում մարդկանց կարծիքներին, սակայն առայժմ որևէ որոշում չկա: 

Տեղեկացնենք, որ ՀՀ քաղաքացիական օրենսգրքի 372-րդ և 417-րդ հոդվածներով սահմանված է տուժանքի պակասեցման և պատասխանատվության ազատման հիմքերը արտակարգ իրավիճակների (форс мажор կամ անհաղթահարելի ուժ) ժամանակ: Միևնույն ժամանակ, 1091-րդ հոդվածով սահմանված է անձանց կողմից վնասի պատճառման պատասխանատվությունից ազատման հիմքերը: