ՈՒՇԱԴՐՈՒԹՅՈՒՆ. Այսուհետ ՃՈ տուգանքները վարչական դատարանում բողոքարկելու համար վարորդները պետտուրք կվճարեն

ԱԺ «Բարգավաճ Հայաստան» խմբակցության անդամ Նաիրա Զոհրաբյանը ֆեյսբուքյան իր էջում «Վարորդներին չեք ասում օրենքի փոփոխության մասին, որ տոնածառային տրամադրությունները չփչանա՞ն» վերտառությամբ գրառում է արել, որում, մասնավորապես, նշել է.

«Եվ այսպես, մի քանի օր առաջ խորհրդարանական մեծամասնությունը ընդունեց «Ճանապարհային երթևեկության կանոնակարգման բալային համակարգի ներդրման» օրենքի նախագիծը։ Բալային համակարգի սպասվող «բոլոլային» դեռ հանգամանալից կանդրադառնամ։

Իսկ հիմա մի փոքրիկ «սպռավոչկա» վարորդների համար, որ հանկարծ էս նախատոնական ֆոնին անակնկալի չգան ու խելոք գնան վարչական դատարան։

Եվ այսպես, եթե պետավտոտեսուչը ձեզ տուգանում է, ասենք, 2 հազար դրամ, բայց դուք վստահ եք, որ այդ օրինախախտումը չեք կատարել, բողոքարկելու և վարչական դատարան դիմելուց առաջ խորը շունչ քաշեք։ Որովհետև, եթե նախկինում վարորդները վարչական մարմնի որոշումների բողոքների մասով պետական տուրքից ազատված էին, հիմա վարչական դատարան դիմելու և բողոքարկելու համար պիտի վճարեն 4 հազար դրամ։ Անգամ, եթե ձեզ տուգանել են հազար դրամ, բայց դուք պետավտոտեսուչի գրած ակտը ուզում եք բողոքարկել։

Ահա էսպես, հպարտ և աննկուն իմ հայրենակիցներ։

Եվ ուրեմն, ինչպես ասվում է դասական գրականության մեջ՝ հանգիստ նստեք տեղներդ ու խելոք վճարեք պետավտոտետուչի գրած ակտը։

Հուսով եմ, որևէ մեկի ամանորյա մաժորը չհարամեցի»: