Ինքնասպանության սպառնալիքներ հնչեցրած երիտասարդը հոսպիտալացվել է
Կառավարության շենքի դիմաց այսօր երիտասարդ տարիքի մի տղամարդ փորձում էր ինքնասպան լինել։ Նա դանակը պարանոցին սպառնում էր, որ ինքնասպան կլինի, եթե վարչապետ Նիկոլ Փաշինյանի հետ չհանդիպի։
Երևանի պետական բժշկական համալսարանի աշխատակազմի ղեկավար Շուշան Դանիելյանն էլ իր ֆեյսբուքյան էջում գրել է, որ տվյալ քաղաքացին քիչ առաջ շտապօգնության մեքենայով տեղափոխվել է թիվ 1 համալսարանական հիվանդանոց, ինքնավնասման արդյունքում քաղաքացին ստացել է պարանոցի շրջանում առաջնային հատվածի վնասվածք, ներկա պահին քաղաքացուն տրամադրվում է առաջին բուժօգնությունը, քաղաքացու վիճակը գնահատվում է բավարար։
Նշենք, որ տղամարդը այս քայլին էր գնացել, քանի որ ինչպես ինքն է նշում՝ քննիչն իր մորից 20 հազար դոլար կաշառք է պահանջել, որ «իր եղբայրներին բանտ չուղարկի»։
Նրա խոսքով՝ եղբայրները գնել են գողացված ապրանք՝ չիմանալով, որ այն գողացված է եղել, և չնայած իրենց բողոքներին, չնայած եղբայրները չեն ընդունել իրենց մեղքը, բայց դատապարտվել են՝ առանց եղած փաստերը հաշվի առնելու։
