Այսօր ԱԺ-ում «Իմ քայլը» խմբակցության պատգամավոր Սիսակ Գաբրիելյանն առաջարկեց առևտրի և ծառայությունների մասին ՀՀ օրենքում փոփոխություններ և լրացումներ կատարելու մասին և կից ներկայացված օրենքների նախագծերի փաթեթը:

Նախագծի հիմնական նպատակը, ինչպես նշեց Գաբրիելյանը, Երևանում շրջիկ առևտրի կետերի հետ կապված հարաբերությունների կարգավորումն է: «Այս պահի դրությամբ առևտրի և ծառայությունների մասին օրենքում կա ձևակերպում, թե ինչ է շրջիկ առևտրի կետը, բայց չկա, թե հատկապես ով է կարգավորելու դրանց հետ կապված մի շարք իրավահարաբերություններ, մասնավորապես՝ ինչ ապրանքներ նրանք կարող են վաճառել, որ վայրերում, ինչպիսի ծառայություններ կարող են մատուցել և որ ժամերին»,-ասաց պատգամավորը:  

Նախագծով առաջարկվում է այդ լիազորությունը տալ Երևանի ավագանուն, և, փոփոխության դեպքում ավագանին կարողանալու է հաստատել այն հիմնական վայրերը, որտեղ կարելի է իրականացնել շրջիկ առևտուր և դրա համար պետք է տեղական տուրք սահմանվի՝ 50.000 դրամ:

Ինչպես նշեց Գաբրիելյանը՝ այս նախագծի նպատակը արգելելը չէ, բայց շրջիկ առևտրի կետերի միջոցով առևտրի կազմակերպման կամ ծառայության մատուցման գործունեություն իրականացնելու են միայն իրավաբանական անձիք, կամ՝ անհատ ձեռներեցները:

«Շրջիկ առևտրի կետերով զբաղվող մի քանի տասնյակ կազմակերպություններ միավորվել են և ստեղծել շարժական սրճարանների միություն, նրանց հետ երկու անգամ հանդիպել եմ»,-ասաց Գաբրիելյանը, հավելելով, որ ներկայացվել են մի քանի պահանջներ: Գաբրիելյանի խոսքով՝ մեկի մասով սկզբունքային չեն եկել համաձայնության, քանի որ տնտեսվարողները պահանջում են, որ թույլտվությունը լինի 3 կամ 6 ամսով, այսինքն՝ մեկ տնտեսվարողին տրվի 6 ամիս թույլտվություն մեկ կետում կանգնելու համար, ինչի դեպքում խախտվում է շրջիկ առևտրի կետի գաղափարը:

Սրա մյուս կողմը նաև այն է, որ եթե Երևանի քաղաքապետը մայթերից հեռացնում է ապօրինի կրպակները, ապա այստեղ անհավասար մրցակցություն է լինում: Գաբրիելյանի կարծիքով՝ այդ նույն կրպակատերերը արդարացի բողոքում են, որ եթե նրանց կրպակը հանում են այդ հատվածից, ապա ինչով են մեղավոր, որ նրանց կրպակի վրա երկու անիվ չկա:

«Լուսավոր Հայաստան»խմբակցության պատգամավոր Անի Սամսոնյանի ավագանին նախապե՞ս է սահմանելու այն տեղերը, որտեղ նախատեսված է իրականացնել շրջիկ առևտուր, թե դա լինելու է ըստ տնտեսվարողների դիմած հայտերի, Գաբրիելյանը պատասխանեց. «Ավագանին նախապես է սահմանելու վայրերը, գծանշան է լինելու այդ վայրերում և տրվելու է էլեկտրական հոսանքի հնարավորություն»: Նա նաեւ հավելեց, որ ցանկացած այլ տրանսպորտային միջոցի կայանումը այդտեղ արգելված է լինելու: