Երևանի ընդհանուր իրավասության դատարանում լարված մթնոլորտում շարունակվում է ընթանալ Ռոբերտ Քոչարյանի և մյուսների գործով դատական նիստը։

Իրավիճակը թեժացավ, երբ Յուրի Խաչատուրովի պաշտպան Միհրան Պողոսյանը դատական նիստում շարունակեց մեղադրանքններ հնչեցնել մեղադրող դատախազ Կարեն Բիշարյանի հասցեին։

«Պարոն Բիշարյանը կամ նախկինում է քաղաքական պատվեր կատարել, կա՛մ հիմա է կատարում», - նշեց փաստաբանը։

Ի պատասխան մեղադրող դատախազներից Պետրոս Պետրոսյանը նշեց․ «Խնդրում եմ ընդհատել պաշտպանին նման հայտարարությունների կապակցությամբ, պաշտպանը չէ, որ նման հայտարարություններով պետք է պիտակավորի ու որակավորի, թե դատախազն ինչպիսի գործողություններ է իրականացնում։ Դատախազը ղեկավարվում է քրեական դատավարության օրենսդրությամբ ու Սահմանադրությամբ, կատարում է իր լիազորությունները»։

Դատավոր Աննա Դանիբեկյանը Միհրան Պողոսյանին հորդորեց կոռեկտ արտահայտվել։

Պողոսյանը, սակայն, շարունակեց. «Իմ գնահատմամբ՝ սույն քրեական գործը իրականացվում է մեկ ամբողջական քաղաքական պատվերի շրջանակում»։

Կրկին խոսեց Պետրոս Պետրոսյանը։

Այս հայտարարությունը զայրացրեց նաև դատախազ Գևորգ Բաղդասարյանին, վերջինս ընդհատեց պաշտպանին: 

«Ես չեմ ընդհատում Ձեզ», - ասաց Պողոսյանը:

 Բիշարյանը հորդորեց չգոռալ։

«Դու ինձ մի ասա՝ ես ինչ անեմ է», - հակադարձեց պաշտպանը:

«Տո էնքան կասեմ», - նշեց Բաղդասարյանը:

«Տեղդ նստի, չես կարա ասես», - շարունակեց պաշտպանը:

Վեճն ավելի թեժացավ. «Դու չպիտի ասես՝ ով ինչ անի», - ասաց դատախազը։ 

Նիստի ժամանակ նաև միջադեպ տեղի ունեցավ դատական կարգադրիչների ու նիստին դահլիճից հետևողների միջև: