«Պանդոկ Երևան» ռեստորանների ցանցի տնօրինությունը ներողություն է խնդրել Արարատ Միրզոյանից՝ էթիկայի կոպտագույն սխալի համար

«Պանդոկ Երևան» ռեստորանների ցանցի տնօրինությունն ու աշխատակազմը ներողություն է խնդրել ԱԺ նախագահ Արարատ Միրզոյանից՝ անձնական տվյալների հրապարակման եւ էթիկայի կոպտագույն խախտման համար: Ընկերության ֆեյսբուքյան էջում հրապարակվել է հայտարարություն, որը ներկայացնում ենք ստորեւ. 

«Հարգարժա՛ն պարոն Միրզոյան, «Պանդոկ Երևան» ռեստորանների ցանցի տնօրինությունն ու աշխատակազմը հայցում է Ձեր ներողամտությունը ստեղծված իրավիճակի և նման անհարմարություն պատճառելու համար: Մեր ցանցը Երևանում գործում է 2006 թվականից և վայելում է երևանցիների և քաղաքի հյուրերի սերն ու վստահությունը: Մեր համար մեր աշխատանքում ամենակարևորն ու առաջնայինը յուրաքանչյուր հաճախորդի հարմարավետությունն է: 

Ստեղծված իրավիճակում մեր աշխատակիցը թույլ է տվել կոպտագույն սխալ՝ խախտել մասնագիտական էթիկայի սկզբունքները։ Մեր ընկերության ղեկավարությունն անթույլատրելի է համարում նման անտեղի շահարկումները և կրկին անգամ ներողություն խնդրում մեր աշխատակցի անթույլատրելի վարքագծի համար»։