ՊՊԾ գնդի գրավման գործով նիստերը կրկին կլինեն դռնբաց

Պարեկապահակետային ծառայության  գնդի գրավման գործով  Պավել Մանուկյանի, Վարուժան Ավետիսյանի և մյուսների խմբից այսօր դատարանը պետք է լսեր վերջին ամբաստանյալի՝ Արեգ Կյուրեղյանի ցուցմունքը:

Հիշեցնենք՝ նրա նկատմամբ դատարանը սանկցիա է կիրառել և հեռացրել դահլիճից դատարանում անպատշաճ վարքագծի պատճառով: 

Այսօր ներկայացել էր նաև նրա պաշտպան Տիգրան Եգորյանը: Վերջինս ժամանակ խնդրեց հարցաքննությանը պատրաստվելու համար, նաև ներգրավվեց որպես ամբաստանյալ Սմբատ Բարսեղյանի շահերի պաշտպան, տեղեկացրեց, որ Սմբատը կրկին ցուցմունք կտա  դատարանում, քանի որ անցած նիստին հրաժարվել էր խոսելուց:

Այսօրվա նիստին Պավել Մանուկյանը միջնորդեց, որպեսզի դատական նիստերը կրկին անցկացվեն դռնբաց:

Հիշեցնենք, որ տևական ժամանակ նիստերն անց են կացվում մասնակի դռնբաց, միայն ԶԼՄ-ների համար: Դատարանը բավարարեց այս միջնորդությունը: Հաջորդ դատական նիստից՝ դեկտեմբերի 11-ից դահլիճում կլինեն նաև ամբաստանյալների աջակիցներն ու հարազատները: