Վերջին պահին եմ իմացել, որ ես եմ ցուցադրության բացումն անելու. Արմինե Հարությունյան

Շատերին հայտնի որպես «Gucci–ի հայ մոդել» Արմինե Հարությունյանի հանդեպ հետաքրքրությունը արտերկրում չի պակասում: Օրերս մոդելը մասնակցել է Վրաստանում հեղինակավոր «Mercedes-Benz Fashion Week Tbilisi»-ի շրջանակում տեղի ունեցած Dalood ապրանքանիշի ցուցադրությունը։

Արմինե Հարությունյանը Վրաստանից հատուկ հրավեր էր ստացել:

 Նրա հետ կապվել են Dalood ապրանքանիշի ներկայացուցիչները, առաջարկել վճարել նույնիսկ ճանապարհածախսը, որպեսզի Արմինեն մասնակցի նոյեմբերի մեկի շոուի բացմանը։ Հեղինակավոր ցուցադրության բացման համար «Dalood»-ի ներկայացուցիչները որոշել են ընտրել հենց Արմինե Հարությունյանին:

Ցուցադրությունից հետո չեն դադարում նրա մասին քննարկումները: Վրացական լրատվամիջոցները եւս մեծ հետաքրքրություն են ցուցաբերում աղջկա հանդեպ: Նախքան Dalood ապրանքանիշի ցուցադրությանը մասնակցելն էին վրացական լրատվամիջոցները մի քանի անգամ անդրադարձել մոդելին: Արմինեի՝ Gucci-ի ցուցադրության անսպասելի հրավերը շատերի ուշադրություն էր գրավել:

Արմինե Հարությունյանն արդեն վերադարձել է Վրաստանից եւ անցել իր հիմնական աշխատանքին: «Հայկական ժամանակ»-ի հետ զրույցում մոդելը կիսվեց  Վրաստանում կայացած ցուցադրության տպավորություններով: «Ամեն ինչ բարձր մակարդակով էր արված: Վերջին պահին եմ իմացել, որ ես եմ ցուցադրության բացումն անելու: Վերջին պահին իմ հագուստը փոխեցին: Մի քիչ վախենալու էր, բայց սպասվածից էլ լավ ստացվեց»,-ասաց Արմինե Հարությունյանը:

Gucci-ի ֆեյշըն շոուին մասնակցելուց հետո սա նրա երկրորդ հրավերն էր: Արմինեն հայտնեց, որ մեր նախորդ զրույցից հետո իր կյանքում առանձնապես ոչինչ չի փոխվել: Շարունակում է աշխատել «Բեթ Կոնստրակտ» ընկերությունում՝ որպես գրաֆիկ-դիզայներ, իլյուստրատոր:

Մոդելից հետաքրքրվեցինք, թե այժմ ինչպես է վերաբերվում իր հասցեին հնչած մեկնաբանություններին. «Չեմ կարդում, առանձնապես չեմ հետաքրքրվում, բայց դարձյալ նույն համոզմանն եմ՝ կարծիքները կարող են եւ պետք է լինեն տարբեր, այլ բան է, երբ կարծիք հայտնողներն անցնում են վիրավորանքներին»: