2020-ին կբարձրանա 502 000 քաղաքացու թոշակ

Աշխատանքի և սոցիալական հարցերի նախարար Զարուհի Բաթոյանն այսօր ԱԺ համատեղ նիստերում ներկայացրել է ոլորտի բարեփոխումները հաջորդ տարվա համար: 2020-ի բյուջեն կկազմի 495.5 մլրդ դրամ, որը գերազանցում է 2019-ի ցուցանիշը 10.8 տոկոսով, այսինքն՝ 47․98 մլրդ դրամով:

Բաթոյանը նշեց, թե որ ուղղություններով են դրանք ծախսվելու:

«Ուղղված են լինելու կենսաթոշակների 10 տոկոսով բարձրացմանը, որտեղ նախատեսում ենք նվազագույն կենսաթոշակի չափը 25 500 դրամի փոխարեն 26500, աշխատանքային և զինվորական կենսաթոշակի չափը դարձնել 18 000 16 000-ի փոխարեն, և աշխատանքային ստաժի 1 տարվա համար սահմանել 950 դրամ 800-ի փոխարեն: Ծերության, հաշմանդամության, կերակրողին կորցնելու դեպքում նպաստների համար սահմանել 26 500 դրամ 25 500-ի փոխարեն: Նախատեսվում է, որ կբարձրանա զինկենսաթոշակառուների և աշխատանքային կենսաթոշակը»,- թվարկեց նա:

Ընդհանուր առմամբ՝ կբարձրանա 502 000 մարդու թոշակ:

«Մյուս ոլորտը, որ հուզում է քաղաքացիներին, նպաստի համակարգն է: Այս ոլորտի բարեփոխմանն ուղղված աշխատանքային խումբ է ստեղծված վարչապետի մակարդակով, տարվա վերջին կունենանք բարեփոխված համակարգի նոր առաջարկ, որը կքննարկենք ԱԺ-ի հետ»,- նշեց նախարարը: