Կառավարությունը որոշեց իջեցնել Ազատանի ջրամբարի մակարդակը

Ջրամբարի տեխնիկական վիճակն ստուգելու ու վերանորոգելու համար որոշվել է իջեցնել ջրամբարում ջրի մակարդակը։

Արարատի մարզում գտնվող Ազատի ջրամբարը գրեթե կդատարկվի։ Այս որոշումն այսօր` հոկտեմբերի 31–ին ընդունել է ՀՀ կառավարությունը հերթական նիստում։

Որոշման համաձայն, ջրամբարի մեռյալ (նվազագույն) ծավալը ներկայում հաստատված 1013,9 մ նիշից  ժամանակավորապես կիջեցվի մինչև 993 մ։

Նպատակը ջրամբարի հատակի վթարված ջրթողի տեխնիկական վիճակի զննումն ու գնահատումն է, և փականը նորով փոխարինելու անհրաժեշտությունը:

Հիշեցնենք` Ազատի ջրամբարը շահագործվում է 1976թ.–ից։ Դրա  խողովակաշարն ու 4 փականները բարոյապես և ֆիզիկապես մաշվել են: Փականներից 2-ը չեն գործում, ինչի հետևանքով ջրբացթողումն իրականացվում է խափանումներով:

Իսկ 2017թ. վթարվել է նաև ջրամբարի հատակային ջրթողը: Արդյունքում Արարատյան դաշտի գյուղերին ոռոգման ջուր մատակարարելու համար կառուցված ջրամբարը վերջին տարիներին գրեթե չի իրականացնել այդ գործառույթը։