ՔԿ նախագահը՝ Վիգեն Սարգսյանին հարցաքննության կանչելու մասին

Պաշտպանության նախկին նախարար Վիգեն Սարգսյանը չի հրավիրվել հարցաքննության։ Այս մասին լրագրողների հետ զրույցում ասաց ՀՀ քննչական կոմիտեի նախագահ Հայկ Գրիգորյանը:

«Որքանով տեղյակ եմ՝ ՀՀ-ում չէ, չի հրավիրել հարցաքննության»,- ասաց նա:

Հարցին, թե ի՞նչ նորություն կա գործի վերաբերյալ՝ Գրիգորյանը պատասխանեց. 

«Այստեղ նորության խնդիր չկա, կան մի շարք տվյալներ, որոնք վկայում են, որ հանձնաժողովի կողմից բնակարաններ են հատկացվել անձանց, որոնց կամ ավելի ուշ պետք է հատկացվեր կամ էլ պետք է հատկացվեր հանձնաժողովի քննարկման արդյունքում, այլ ոչ թե միանձնյա որոշման շրջանակներում»,- ասաց նա:

Գրիգորյանի խոսքով՝ Վիգեն Սարգսյանը որպես մեղադրյալ ներգրավված չէ:

Նշենք՝ ավելի վաղ Քննչական կոմիտեն տեղեկացրել էր, որ Վիգեն Սարգսյանին առնչվող գործը ՀՔԾ-ից ուղարկվել է ՔԿ։