«Holiday Inn» հյուրանոցը Կարեն Կարապետյանինը չէ

Հանրապետության հրապարակի հարևանությամբ կառուցվող «Holiday Inn» հյուրանոցը չի պատկանում ՀՀ նախկին վարչապետ Կարեն Կարապետյանին, այս մասին Aysor.am-ի թղթակցի հարցին ի պատասխան ասել են  Կարեն Կարապետյանի գրասենյակից։

«Ժամանակ» թերթն այսօր գրել էր, թե Ամիրյան փողոցի սկզբնամասում, Հանրապետության հրապարակի հարևանությամբ գտնվող շենքի վրա փակցված պաստառը տեղեկացնում է, որ շուտով այդ շենքում բացվելու է «Holiday Inn» հյուրանոցը:

Ըստ թերթի տեղեկությունների՝ այդ հյուրանոցը պատկանում է նախկին վարչապետ Կարեն Կարապետյանին:

««Ժամանակ» օրաթերթում այսօր հրապարակված լուրը, թե Երևանում բացվելիք «Holiday Inn» հյուրանոցն, իբր, պատկանում է նախկին վարչապետ Կարեն Կարապետյանին, բացառապես իրականությանը չի համապատասխանում:

Անհրաժեշտ ենք համարում նշել, որ վերջին շրջանում «Ժամանակ» օրաթերթը ձեռագիր է դարձրել մասնավորապես Կարեն Կարապետյանի վերաբերյալ ստահոդ և մանիպուլյատիվ լուրերի տարածումը:

Մեր հրապարակային պահանջն է, որպեսզի նշված լրատվամիջոցը հանդես գա այդ հրապարակումների հերքումով և հետագայում ձեռնպահ մնա Կարեն Կարապետյանի անվան շուրջ նման շահարկումներից, այլապես՝ կհանդիպենք դատարանում», - հաղորդեցին նախկին վարչապետ Կարեն Կարապետյանի գրասենյակից։