Համոզված եմ, որ դատարանը կբավարարի մեր հայցը. Արմեն Մուրադյան

Ինչպես արդեն հայտնել ենք, ԵՊԲՀ ռեկտոր Արմեն Մուրադյանը դատի է տվել առողջապահության նախարար Արսեն Թորոսյանին։

Արմեն Մուրադյանը նախարարից  պահանջում է զրպարտչական արտահայտությունների հերքում և պատճառված վնասի հատուցում:

ArmDaily.am-ի հետ զրույցում Մուրադյանի շահերի պաշտպան Գագիկ Խաչիկյանն ասել է, որ իրենց հաղթանակի վրա չի կասկածում։

«Մենք պետք է պնդենք մեր հայցը, համոզված եմ, որ դատարանը կբավարարի այն, քանի որ մեր ունեցած փաստերը բացարձակապես իրականություն են»,-ասել է Խաչիկյանը։

Թե երբ կլինի առաջին դատական նիստը՝ փաստաբանը չգիտի, ծանուցում դեռևս չեն ստացել։

«Պրակտիկան ցույց է տալիս, որ ծանուցում ստանալը կարող է տևել 15 օրից մինչև մեկ ամիս»,-նշել է փաստաբանը։

Խաչիկյանն ասում է ՝  կներկայցնեն իրենց փաստարկները, կտեսնեն մյուս կողմի փաստարկներն ու կսպասեն դատարանի վճռին։

Նշենք, որ հայցը ներկայացվել է հոկտեմբերի 2-ին: Գործը մակագրվել է Երեւան քաղաքի ընդհանուր իրավասության դատարանի դատավոր Գրիգորի Վարդանյանին:

Հիշեցնենք, որ սեպտեմբերի 3-ի իր մամուլի ասուլիսից հետո, ֆեյսբուքյան ուղիղ եթերով Թորոսյանը հայտարարել էր, որ իր դեմ արշավն ուղղորդում է Արմեն Մուրադյանը։ Ի պատասխան՝ Արմեն Մուրադյանն Արսեն Թորոսյանին ստախոսության մեջ  էր մեղադրել։