Ստուգայցեր՝ Երևանի տրանսպորտում

Երեւանի քաղաքապետարանի «Երեւանտրանս» ՓԲԸ աշխատակիցները ստուգայցեր են իրականացնում մայրաքաղաքի հասարակական տրանսպորտը սպասարկող երթուղիներում:

Քաղաքապետարանից  հայտնում են, որ տեղում ստուգվում է ուղեգրերի վրա բուժակ-մեխանիկի կնիքի, վարորդների վարորդական իրավունքի առկայությունը, ինչպես նաեւ մեքենաների արտաքին տեսքի եւ ուղեւորասրահի համար սահմանված անհրաժեշտ պայմանների ապահովումը:

Հերթական շրջայցի ընթացքում ստուգումներ են իրականացվել թիվ 13, 57 եւ 99 երթուղիներում: Միկրոավտոբուսային թիվ 99 երթուղում ուսումնասիրության ընթացքում հայտնաբերվել են արտաքին եւ ներքին տեսքի մի շարք թերություններ: Մասնավորապես, որոշ մեքենաների ուղեւորասրահներ գտնվել են հակասանիտարական եւ անբարեկարգ վիճակում: Այդ մեքենաները դուրս են բերվել երթուղուց:

Ստուգայցերի ժամանակ ընկերության աշխատակիցները վարորդներին մեկ անգամ եւս հորդորել են չծխել ղեկին եւ հիշեցրել, որ սահմանված կանոնները չպահպանելու պարագայում վերջիններս կենթարկվեն վարչական պատասխանատվության:

Ստուգայցերը կրելու են շարունակական բնույթ. ուսումնասիրվելու են բոլոր երթուղիները: