ՀԵՐՔՈՒՄ․ Օտարերկրացիները միայն Հայաստանում մեքենան վարելու դեպքում պետք է ունենան բնակության փաստաթուղթ

Լուրեր էին շրջանառվում, որ բոլոր այն անձիք, որոնք մեքենա են գնել և ներմուծում են Հայաստան, որպեսզի վաճառեն այլ երկրի քաղաքացիներին, պարտավոր են  վաճառել միայն այն օտարերկրացի անձանց, որոնք Հայաստանի Հանրապետությունում օրինական բնակությունը հավաստող փաստաթուղթ` մշտական կացության քարտ կամ ժամանակավոր կացության քարտ կամ Հայաստանի Հանրապետության հատուկ անձնագիր ունեն: 

Առաջացած խուճապի պատճառը կառավարության որոշման ոչ ամբողջական մեկնաբանումն էր։ Նկատենք, որ օրենքը նախատեսված է միայն այն օտարերկրացիների համար, որոնք պատրաստվում են գնված մեքենան վարել Հայաստանի տարածքում (խոսքը չի վերաբերվում գնված մեքենայով Հայաստանի տարածքից դուրս գալուն)։ 

Հիշեցնենք՝ կառավարության նոր որոշման համաձայն տրանսպորտային միջոցները օտարերկրյա քաղաքացիներին վաճառելու համար, վերջիններիս պահանջվելու  է օտարերկրյա պետության կամ միջազգային կազմակերպության կողմից տրված անձնագիր կամ ճամփորդական փաստաթուղթ (միջազգայնորեն ճանաչված) և Հայաստանի Հանրապետությունում օրինական բնակությունը հավաստող փաստաթուղթ` մշտական կացության քարտ կամ ժամանակավոր կացության քարտ կամ Հայաստանի Հանրապետության հատուկ անձնագիր: