ՏԵՍԱՆՅՈՒԹ․ Հայ կնոջ աչքերից բյուրեղներ է թափվում
SHANTNEWS-ը բացառիկ նկարահանումներ է արել Արթիկի տարածաշրջանի Սպանդարյան գյուղում: Երկու ամիս առաջ Միքայելյանների ընտանիքի 22-ամյա հարսի՝ Սաթենիկ Ղազարյանի մոտ տարօրինակ երևույթներ են ի հայտ եկել: Երևույթն այնքան անհավանական ու զարմանահրաշ էր ընտանիքի բոլոր անդամների համար, որ բոլորի մոտ շոկ էր առաջացրել: 22-ամյա կնոջ աչքերում բյուրեղյա արցունքներ են գոյանում, որոնք դուրս են բերվում օրական 4-5 անգամ:
Այն, ինչ կատարվում է Սաթենիկի հետ, անհավատալի է: Բացառիկ երևույթը ֆիքսել է մեր տեսախցիկը:
Միքայելյանների տանն ամենից շատ մեր նկարահանող խմբին Սաթենիկն էր սպասում: Աչքի մեջ գոյացած կարծր բյուրեղները ամբողջ գիշեր ու մինչև կեսօր չէին հեռացրել, որպեսզի մեր ներկայությամբ աչք ծակող մանր ու մեծ բյուրեղները հանվեին կնոջ աչքից: Այն, ինչն անհավանական ու անհավատալի էր թվում անգամ մեզ, հենց այդ պահին ու տեսախցիկի առջև իրական բացահայտում դարձավ:
Արդեն 2 ամիս, օրական մի քանի անգամ՝ մեկ կամ 2 ժամը մեկ Սաթենիկի սկեսուրը՝ Զեմֆիրա Միքայելյանը, նրա աջ աչքից հեռացնում է սպիտակ, թափանցիկ, սուր ու կարծր բյուրեղները: Միայն դրանից հետո են հանգստանում աչքի ուժեղ ծակոցները: Սաթենիկի խոսքերով` ժամը բյուրեղներն առաջանում են, ու ինքը ծակոցներ է զգում: Տեսողությունը դրանից չի վատանում, բայց երբ բյուրեղները շատ են աչքը լցվում, աչքերի առաջ սևանում է:
Աչքի անհանգստացնող ծակոցներին Սաթենիկը սկզբում ուշադրություն չի դարձրել, մտածել է` գյուղի գործերի մեջ, հողային աշխատանքների ժամանակ ինչ-որ բան է ընկել աչքի մեջ, բայց չդադարող ցավերը ստիպել են սկեսրոջը ուշադիր զննել աղջկա աչքը: Այն, ինչ տեսել է, շոկի է ենթարկել նրան:
Եզակի երևույթը հիմա արդեն քննարկման առարկա է դարձել ողջ գյուղում, ու միայն համագյուղացիներն են, որ հավատում են իրենց տեսածին: Աչքից հանված գունավոր բյուրեղները իրենց հետ տարել են` որպես զարմանահրաշ երևույթի ապացույց: Սաթենիկի ու ընտանիքի համար կատարվածը հիմա արդեն սովորական բան է, հետաքրքիրն այն է, որ բյուրեղները գիշերը քնած ժամանակ ցավեր չեն առաջացնում: Դրանք ոչ միայն կարծր են, այլև բավական սուր: Համոզվեցինք նաև դրանում:
Ֆենոմենալ դեպքը, որքան որ զարմանալի է, այնքան էլ անհանգստացնում է Միքայելյանների ընտանիքին, որոնք Սաթենիկի առողջությամբ են մտահոգված: Ինչի հետևանքով են առաջանում բյուրեղները և ինչ բաղադրության են, փորձել են հասկանալ դիմելով ակնաբույժներին: Բժիշկներ եղել են, որ անլուրջ պատմություն են համարել կամ երևակայության արդյունք, մի երկու ակնաբույժ էլ հետազոտել են Սաթենիկին, բայց ախտորոշել չեն կարողացել, ասել են՝ բժշկագիտությանը անհայտ երևույթ է:
«Գյումրի» բժշկական կենտրոնի ակնաբույժը դեղորայք է նշանակել, Սաթենիկը 5 օր օգտագործել է, այդ ընթացքում աչքի մեջ բյուրեղներ չեն առաջացել: Բայց կնոջ ինքնազգացողությունն է կտրուկ վատացել: Ստիպված հրաժարվել է, ցավերը հանգստացնող միակ տարբերակը բյուրեղյա արցունքները աչքից դուրս բերելն է: Մեր նկարահանման 2 ժամերի ընթացքում, երբ նաև Սաթենիկը սկսեց տնամերձում հողի գործ անել, նորից սկսեցին նույն երևույթները տեղի ունենալ: Բյուրեղներն անպայման հեռացնել էր պետք, որ ցավերը չուժեղանային:
Դրանցից նմուշներ առողջապահության փոխնախարարն է ուղարկել հետազոտման: Երկու շաբաթ է անցել, Միքայելյանները սպասում են պատասխանի: Տիկին Զեմֆիրայի համար հարսի առողջությունը շատ թանկ է, ասում է` տղան առաջին կարգի հաշմանդամ է, աշխատանք չունի: Որդու ընտանիքում հիմնական աշխատող ձեռքը հարսն է, խնամքին էլ 5,5-ամյա փոքրիկ ունեն:
