Արմեն Գևորգյանը դատի է տվել «Իմ քայլը» խմբակցության պատգամավորին և փաստաբանին. Armtimes.com

ՀՀ նախկին փոխվարչապետ Արմեն Գևորգյանը դատի է տվել ՀՀ ԱԺ «Իմ քայլը» խմբակցության պատգամավոր Արուսյակ Ջուլհակյանին և փաստաբան Մուշեղ Շուշանյանին, հայտնում է «Հայկական ժամանակ»-ը:

Նա պահանջում է պարտավորեցնել պատասխանողներին վիրավորանք և զրպարտություն համարվող տեղեկությունները հերքել, հրապարակային ներողություն խնդրել: Նաև փոխհատուցման պահանջ կա: Բացի դրանից՝ հայցվորը պահանջում է անմեղության կանխավարկածի խախտումը արձանագրել: Այս մասին կայքը տեղեկանում է Դատական տեղեկատվական համակարգից:

Հայցադիմումը ներկայացվել է սեպտեմբերի 2-ին և մակագրվել է Երևան քաղաքի ընդհանուր իրավասության դատարանի դատավոր Արթուր Ստեփանյանին:

Օգոստոսի 7-ին Ջուլհակյանն ու Շուշանյանը մամուլի ասուլիս են տվել ՄԻԵԴ որոշման վերաբերյալ, որով ՀՀ-ն պարտավորվում է սեփականությունից զրկված Յուրի Վարդանյանին 1 մլն 600 հազար եվրո վճարել: Ջուլհակյանը նշել էր, որ ամեն ինչը իրականացվել է նախագահի աշխատակազմի ղեկավար Արմեն Գևորգյանի կոորդինացիայի ներքո: Շուշանյանն էլ նշել էր, որ Կենտրոնի բնակիչների սեփականության իրավունքի զանգվածային խախտումների գործընթացին ներգրավված է եղել այն ժամանակվա պետության բարձրագույն իշխանությունը, կոնկրետ Ռոբերտ Քոչարյանի աշխատակազմը:

Ռոբերտ Քոչարյանի նախագահության օրոք, որպես պետական կարիք, պետությունը Յուրի Վարդանյանին զրկել է իր՝  Բուզանդի 13 հասցեում գտնվող սեփականության իրավունքով պատկանող տնից և հողամասից, ընդհանուր 1385 քառակուսի մետր տարածք: