Ջերմուկում այսօր սպասում են վարչապետ Նիկոլ Փաշինյանին

Օրեր առաջ Քննչական կոմիտեն հրապարակեց Ամուլսարի հանքավայրի փորձաքննության վերջնական եզրակացությունը։ Ըստ փորձաքննության արդյունքների՝ հավանականությունը շատ ցածր է, որ Ամուլսարի հանքի աղտոտված ջրերը ազդեցություն կունենան Ջերմուկի աղբյուրների վրա, քանի որ ստորգետնյա ջրերի հոսքի եւ աղտոտումը փոխանցելու ուղիներ առկա չեն:

Դրան հաջորդեց ինքնաբուխ հավաք եւ ավտոերթ  Ջերմուկում՝ ի պաշտպանություն Ամուլսարի։ Այսօր արդեն ջերմուկցիները սպասում են ՀՀ վարչապետ Նիկոլ Փաշինյանին, խնդրի վերաբերյալ քննարկմանը մասնակցելու:

Այսօր առավոտից արդեն համացանցում լուրեր են պտտվում, որ Ջերմուկի մոտ ոստիկանության մեծ ուժեր են հավաքվում, ոստիկաններ են տեղափոխվում Վայոց Ձոր։ 

Ոստիկանության հասարակայնության հետ կապերի բաժնից ArmDaily.am-ի հարցին ի պատասխան, թե արդյոք լուրը համապատասխանում է իրականությանը, պատասխանեցին,որ ոստիկանությունը գործում է բացառապես օրենիք սահմաններում և կատարում է իր վրա դրված պարտականությունները։ 

Infocom.am-ի հետ զրույցում էլ Ջերմուկի բնակիչ Շիրակ Բունիաթյանն ասում է, որ ջերմուկցիներն այսօր՝ ժամը 17-ին են իրականացնելու ակցիան:  

Ակցիայի հիմնական նպատակն այն է, որ Ջերմուկ համայնքի բնակիչները դուրս են գալիս փողոց՝ ևս մեկ անգամ վերահաստատելու, որ անկախ փորձաքննության արդյունքներից՝ մեզ մոտ դիրքորոշում չի փոխվել, մենք ի սկզբանե չենք ասել՝ սա լավ հանք է, վատ հանք է, մեն ասել ենք՝ սա առողջարանային գոտի է, ու այստեղ ոչ մի տիպի մետաղական հանք պետք է չլինի։ Բնակչությունը դուրս է գալիս խաղաղ ակցիայով, բաց ձեռքերով՝ վերահաստատելու իր՝ մեկ տարուց ավել առաջ կայացրած որոշումը։