Գոյություն ունի կարգ, գոյություն ունի կառավարության որոշում, գործում են օրենքներ, ըստ որոնց, եթե Հայաստանի Հանրապետությունում հնարավոր չէ բուժում իրականացնել, ապա զինծառայողներին այդ հնարավորությունը տրվում է, նրանց բուժումը իրականացվում է  արտերկրում: Այս մասին լրագրողների հետ զրույցում ասաց պաշտպանության նախարար Դավիթ Տոնոյանը` անդրադառնալով ապրիլյան պատերազմի մասնակից Հայկ Սեխիլյանի բուժումը Եվրոպայում իրականացնելու համար ֆինանսավորում չտրամադրելու խնդրին:

Նա նշեց, որ եթե հանձնաժողովն այդ որոշումը չի կայացնում, բնական է՝ պետք է բուժումը իրականացվի առանց սուբյեկտիվ մոտեցումների:

«Բոլորը կարող են ասել` ես ուզում եմ գնալ այստեղ կամ այնտեղ, բուժում ստանալ, բայց այդպես չի կարելի: Եթե այդ բուժումը կարելի է Հայաստանում կազմակերպել, պետք է կազմակերպել Հայաստանում և դրա պատասխանատվությունը համապատասխան կառույցներն են կրում»,-ասաց նա:

Անդրադառնալով առաջնագծին, պաշտպանության նախարարն ասաց, որ այս պահին համեմատաբար անդորր է, խաղաղ է:

Տեսանյութը՝ News.am