Հրաձգություն Տեխասում․ կա առնվազն 20 զոհ

ԱՄՆ Տեխաս նահանգի Էլ-Պասո քաղաքի առևտրի կենտրոններից մեկում տեղի ունեցած հրաձգության հետևանքով զոհվել է առնվազն 20 մարդ։ Զոհերից ամենափոքրը 2 տարեկան է։ Այս մասին հայտնել է քաղաքի ոստիկանության ներկայացուցիչ Ռոբերտ Գոմեսը։ Ավելի քան 20 մարդ տուժել է։ Նրանք գտնվում են քաղաքի տարբեր կլինիկաներում։

Զինված հարձակման դեպքի հետ կապված՝ ոստիկանությունը ձերբակալել է 21-ամյա տղամարդու։ Նա ենթադրաբար կիրառել է АК-47։

Ոստիկանության տվյալներով՝ Պատրիկ Կրուզիոսը մինչ առևտրի կենտրոնում հրաձգություն իրականացնելը, հրապարակել է մանիֆեստ, որում աջակցություն է հայտնել Նոր Զելանդիայի մզկիթում իրականացված ահաբեկչությանը։ 

Գործը կդիտարկվի որպես ատելության հողի վրա իրականացված հանցագործություն։

Տեղի ունեցածին արձագանքել է ԱՄՆ նախագահ Դոնալդ Թրամփը։ Նրա խոսքով՝ Էլ-Պասոյում տեղի ունեցած հրաձգությունը նողկալի արարք է, վախկոտության դրսևորում, որը չունի արդարացում։