Ըստ Փաշինյանիՙ բանակում այսօր էլ յուրացնողներ կան

Վարչապետ Նիկոլ Փաշինյանը լրագրողների հետ հանդիպման ժամանակ անդրադարձավ նաև այն հարցին, թե ինչու են զինվորների ծնողները շարունակում ծանրոցներ ուղարկել: Վարչապետը խնդրին անդրադարձավ խորապես, նշելով, որ կան մեխանիզմների խնդիրներ: «Այդ հարցով ես հրավիրել եմ գլխավոր շտաբի պետին՝ ասելով, որ այսպիսի խնդիր եմ դնում, կարո՞ղ եք լուծել խնդիրը: Ասել են` խնդիր չկա, կլուծենք: Դրանից մի 10 օր հետո լուր եմ ստացել, որ սպաները մտնում են զորամասեր, խուզարկում են, և ծնողների ուղարկածները առգրավում են զինվորների մոտից: Այսինքն հանձնարարականը այլ կերպ է կատարվել: Դրանից հետո ես գնացել եմ դիրքեր, ասել եմ բերեք զինվորների ուտելիքը: Դա ես անձամբ կերել եմ: Արդյունքում՝ ինձ վատ եմ զգացել, և հանձնարարել եմ այդ ուտելիքները հանել շրջանառությունից: 2-3 ամիս հետո արձանագրում եմ, որ չեն հանել դեռևս շրջանառությունից»: Վարչապետը նշեց, որ ներքնազգեստների խնդիրը լուծելու համար էլ, որպեսզի բացառեին կոռուպցիոն ռիսկերը, բոլոր ընկերություններին հրավիրել էին միաժամանակ և զրուցել էին տեսախցիկների ներքո: «Այսօր արդեն կարող եմ արձանագրել, որ մեր զինվորները ապահովվում են բարձրորակ վարտիքներով ու շապիկներով»: Հիմա փորձարկման շրջանում նոր կոշիկն է։ Առաջին տպավորությունը դրական է եղել, բայց կան բողոքներ, որոնց ուղղությամբ աշխատանքներ են տարվում: Վարչապետը նշեց, որ խնդիր կա նաև համազգեստի հետ: Համազգեստում ցանկանում են ավելացնել բամբակի բաղադրիչը: Ավելի տաք շրջաններում ծառայողների համար էլ գուցե և լինեն համազգեստի ամառային՝ կարճաթև տարբերակներ: Վարչապետն անդրադարձավ նաև պայմանագրային զինծառայողներին: Նրանք դիրքեր բարձրանալուց առաջ առևտուր են անում խանութից ու մթերքը տանում դիրքեր։ Վարչապետը հանձնարարել է պարզել՝ ինչ են գնում խանութից և այդ մթերքով ապահովել զինվորներին, որ այլևս խանութներից չանեն առևտուրը: Սննդի մեջ էլ ավելացվել է լավաշ, մեղր, սեզոնին՝ վարունգ, լոլիկ: Իսկ ծանրոցների հարցն անհատական է, վստահեցրեց վարչապետը։ «Օրինակ՝ սնիկերս չենք տալիս, բայց քաղցրավենիք տալիս ենք: Ծխախոտի հարցը կա: Զինվորների բավարարումները պատրաստվում ենք բարձրացնել»: Վարչապետը նշեց, որ այսօր էլ կան բանակում յուրացնողներ, և քրեական գործեր են հարուցվել: