Ուսուցիչների աշխատավարձի վճարման կարգը կփոխվի

Գյուղական դպրոցներում տարեցտարի աշակերտների թիվը նվազում է, և դպրոցների մեծ մասում դասապրոցեսը կազմակերպվում է երկկոմպլեկտ ու եռակոմպլեկտ դասարաններում, ինչը մեծ դժգոհություն է առաջացնում թե՛ մանկավարժների, և թե՛ ծնողների մոտ: Մանկավարժները դժգոհում են կրկնակի կատարվող աշխատանքից, իսկ ծնողները՝ կրթական որակից, երբ ցածր դասարանի երեխան ստիպված է լինում ներկա գտնվել ու լսել նաև բարձր դասարանցիների թեմաները, ինչը հաճախ շփոթությունների տեղիք է տալիս: Խնդիրը գտնվում է ԿԳՆ ուշադրության կենտրոնում և նախատեսվում են որոշակի փոփոխություններ: «Կառավարության ծրագրում հիմա այդ հարցը դրված է, որ փոքր համակազմ ունեցող դպրոցների կառավարման և առհասարակ դասավանդման մեթոդները փոխվեն, պետք է ստեղծվեն այնպիսի մոտեցումներ, որ մենք կարողանանք այս կարևոր հարցը լուծել։ Հիմա քննարկվում է, թե ինչպես պետք է բազմահամակազմ դասարանների կազմավորման կարգը սահմանել: Նոր կարգը ուղարկվել էր Արդարադատության նախարարություն, դիտողություններ են եղել, և ծրագիրը հետ է եկել, լրամշակվում է »,- ասել է ԿԳՆ հանրակրթության վարչության պետ Աշոտ Արշակյանը։ Աշոտ Արշակյանը նաև նշել է, որ բազմահամակազմ կամ կոմպլեկտ դասարանների ձևավորման կարգը սահմանելուց հետո կհստակեցվեն նաև բովանդակային հարցերը ՝ դասավանդման մեթոդները, ծրագրային նյութերը, ժամաքանակի բաշխվածությունը, ինչպես նաև ուսուցիչների վճարման կարգը: