«Մարդկանց միջև խտրականություն են դնում». Թորոսյանը՝ Նարեկ Կարապետյանին

ՀՀ աշխատանքի և սոցիալական հարցերի նախարար Արսեն Թորոսյանը քննադատել է «Ուժեղ Հայաստան» կուսակցության ներկայացուցիչ Նարեկ Կարապետյանի հայտարարությունը, ըստ որի՝ Ստեփանավանում, Գյուլագարակում և Տաշիրում 5-րդ երեխայի ծնվելու դեպքում ընտանիքը բնակարան կստանա։

Թորոսյանի խոսքով՝ նման մոտեցումը խտրականություն է քաղաքացիների նկատմամբ։

«Պատկերացնո՞ւմ եք՝ մենք հայտարարեինք, որ մեր բնակարանային ծրագիրը գործում է միայն այն համայնքներում, որտեղ հաղթել ենք։ Դա կնշանակեր խտրականություն դնել մեր քաղաքացիների միջև»,- ասել է նա։

Նախարարը հիշեցրել է, որ կառավարության ծրագրով 2027 թվականից մեկնարկելու է 6 և ավելի անչափահաս երեխա ունեցող ընտանիքների բնակարանային աջակցության ծրագիրը, որը կիրականացվի հանրապետության մարզերում՝ անկախ քաղաքական նախասիրություններից։

«Մենք մեր ծրագրերը շարունակելու ենք, հարյուրավոր ընտանիքների կապահովենք բնակարաններով, իսկ հետագայում կդիտարկենք նաև այլ տարբերակներ»,- նշել է նախարարը՝ հավելելով, որ նման քաղաքական մոտեցումներին «քաղաքական ապտակներ» են սպասվում։

Հիշեցնենք, որ «Ուժեղ Հայաստան» կուսակցության ներկայացուցիչ Նարեկ Կարապետյանը հայտարարել էր, որ Ստեփանավանում, Գյուլագարակում և Տաշիրում, որտեղ իրենց քաղաքական ուժը հաղթել է, 5-րդ երեխայի ծնվելու դեպքում ընտանիքները կստանան բնակարան։