Երևանի հյուրանոցներից մեկում տղամարդու դի է հայտնաբերվել՝ ձեռքերը, ոտքերն ու բերանը կապված

Այսօր՝ հուլիսի 15-ին, ժամը 19։00-ի սահմաններում, ՀՀ ներքին գործերի նախարարության ոստիկանության քրեական ոստիկանությունում և Քրեական ոստիկանության գլխավոր վարչության Երևանի քրեական վարչությունում միաժամանակ ստացվել են օպերատիվ տեղեկություններ այն մասին, որ Նորք-Մարաշ վարչական շրջանի հանրահայտ «Ռէժինէ» հյուրանոցային համալիրի երկրորդ հարկի սենյակներից մեկում դիակ կա։

Shamshyan.com-ի հաղորդմամբ ժամանած իրավապահները պարզել են, որ հաղորդված տեղեկությունը համապատասխանում է իրականությանը։ Հյուրանոցի նշված սենյակում հայտնաբերվել է տղամարդու դի, որի ձեռքերը, ոտքերն ու բերանը կպչուն ժապավենով կապված են եղել։

Կատարվածի առթիվ քննչական բաժնում նախաձեռնվել է քրեական վարույթ սպանության հատկանիշներով։ Այժմ ընթանում է քննություն՝ դեպքի բոլոր հանգամանքներն ու մահացած անձի ինքնությունը պարզելու ուղղությամբ։