Բելառուսը չի եղել և չի լինի Ռուսաստանի մակաբույծը․ Լուկաշենկո
Բելառուսը երբեք չի եղել ձրիակեր, չի եղել Ռուսաստանի մակաբույծն ու չի լինի նաև ապագայում։ Բելառուսները Ռուսաստանի համար ոչ թե ձրիակեր են, այլ հարազատ մարդիկ։ Այս մասին այսօր բելառուս և արտասահմանցի լրագրողների հետ հանդիպմանը հայտարարել է երկրի նախագահ Ալեքսանդր Լուկաշենկոն։
«Դադարեցրե՛ք մեզ մեղադրել ձրիակերության մեջ։ Մենք չենք եղել ձեր կողմից սնուցվող ձրիակեր և չենք լինի։ Երբ ժողովուրդը դա լսում է, հատկապես ես՝ ինքնասիրություն ունեցող մարդս, այլևս որևէ միություն չեմ ուզում (Ռուսաստանի հետ)»։
Բելառուսի նախագահը հայտարարել է, որ իրենք ռուսաստանցիների հետ ոչ թե գործընկեր են, այլ հարազատ մարդիկ։ Լուկաշենկոն ներկայացրել է նաև Ռուսաստան- Արևմուտք հարաբերություններում եղած հակասությունների ֆոնին Բելառուսի կարգավիճակը։
«Մենք դատապարտված ենք ապրել միասին, և մենք դա ձեզնից ոչ պակաս, շատ լավ հասկանում ենք, որ այնտեղ (Արևմուտքում) մեզ չեն սպասում։ Մեր կարիքն այնտեղ չունեն, և դրա օրինակն է Ուկրաինան»,- ասել է Բելառուսի նախագահը։
