Նախկինները հանրությունից թաքցրել են տրված պարգևավճարները. Հայկ Մարության
«Մենք եկել ենք, պատասխանատվություն ստանձնել և քաղաքը տանում ենք առաջ»,- այս մասին այսօր լրագրողների հետ ճեպազրույցում ասաց Երևանի քաղաապետ Հայկ Մարությանը` անդրադառնալով համեմատություններին, թե նախկին իշխանություններն ավելի քիչ են ծախսել պարգևավճարների համար, քան իրենք:
«Համեմատություններ եղան տարբեր մարդկանց կողմից` նախկինները, ներկաները, ես ինքս չեմ սիրում անդրադառնալ նախկինների աշխատելաոճին, բայց նախկինների հետ համեմատությունը մեզ համար ազդակ էր, որ ուսումնասիրեինք և տեսնեինք` արդյոք նախկինները թափանցիկ են` ինչպես ասում են: Երևի մենք մի բան չգիտեինք, երևի հեղափոխությունը հենց այնպես արվեց: Եվ արդյունքում պարզվեց, որ այն պարգևատրումները, որոնք միշտ տրվում են տարվա վերջ, նախկինում տրվել են տարվա ընթացքում` մոտ 287 մլն դրամի պարգևավճարներ են տրվել, որոնք թաքցվել են հանրությունից: Նախ չեն հրապարակվել, երկրորդ, որ ավելի հետաքրքիր է` դրանց տեղը հրապարակվել են այլ կարգադրություններ և այսպիսով կեղծվել է հրապարակային մասը: Եթե հրապարակվեր, շատ ավելին կլիներ, քան մեր տված պարգևավճարներն են»,-նշեց նա:
